KRALENDIJK – For di 1 di yanüari 2025 e Dekreto di Sosten Sosial i Lucha kontra Violensia Doméstiko i Maltrato di Mucha BES ta apliká na Boneiru, Sint Eustatius i Saba. E dekreto aki ta un paso importante den direkshon di un komunidat sigur i kuidá, i ta duna habitante i profeshonalnan di kuido mihó sosten pa por prevení i atendé violensia doméstiko i maltrato di mucha (VDMM).

E dekreto ta konsentrá riba tres área prinsipal. Na promé lugá, ta organisá sosten sosial mihó, pa asina siudadanonan por keda biba independiente na nan kas mas largu posibel. Por pensa aki riba material, pero yudansa na kas òf pasadia tambe ta konta komo sosten sosial.

Na di dos lugá for di 2025, un siudadano òf profeshonal ku tin preokupashon òf ta señalá violensia doméstiko òf maltrato di mucha, por akudí na un sentro spesial pa tuma konseho. Pa profeshonalnan a establesé un derechi di mèldu, ku lo permití nan, bou di kondishonnan kla, mèldu un kaso si nan tin sospecho di violensia.

Kódigo di Protekshon pa Profeshonalnan

Por último, organisashonnan ta obligá pa establesé un Kódigo di Protekshon entrante 1 di yanüari 2025. 

Sinku paso

E kódigo ta konsistí di sinku paso ku profeshonalnan mester sigui ora nan señalá  òf tin sospecho  di maltrato di mucha òf violensia doméstiko. E Kódigo di Protekshon ta duna klaridat na profeshonalnan tokante kiko ta spera di nan ora nan tin sospecho. 

Pa siudadanonan, e Kódigo di Protekshon ta garantisá ku e profeshonal lo traha kuidadosamente i lo diskutí su sospechonan ku e kliente òf ku e mayornan promé ku e mèldu. Ta referí na e Kódigo di Protekshon na e diferente idiomanan di Hulanda Karibense komo Beschermingscode na ulandes i Protection Code na ingles.