Por nota den último dianan aki Fundashon Mariadal a kuminsá ta komuniká hopi mas den prensa. Porfin, lo mi bisa, pasobra sin eksagerá a kuminsá komuniká hopi lat.

Ku esaki mi ke men ku mester a kritiká e fundashon bastante pisá den media, i kasi mester a bini un lantamentu popular, promé ku a kuminsá tuma e deber pa komuniká ku nan kliente na drechi, un tiki mas na serio.

Komunikashon, pa e ta efektivo i tambe kreibel, sin embargo, ta nifiká ku e mester ta honesto, e mester ta konkreto i e mester kuadra ku bèrdat. I akinan mi ta mirando, ku esaki ainda no ta e kaso.

Den un komunikado ku a saka djadumingu, Fundashon Mariadal ta bisa entre otro “Pa e motibu akí botika di hòspital tabata será temporalmente i tabata ofresé servisio na otro manera. Por ehèmpel pa medio di un empleado ku tabata buska resèpt na e dòkter di kas i hiba esakinan na e botika di eskoho. Tabata anunsiá esaki via prensa regular i medionan sosial. Banda di esei Fundashon Mariadal a pone klientenan i stakeholdernan na altura tambe di e konsekuensianan di e seramentu temporal.”, asina e komunikado ta bisa.

I ta aki mi problema ku e komunikado di prensa ta sinta. No ta solamente un kestion di ‘trose e bèrdat’ òf di floria e kos den e kaso aki. E ta un mentira flagrante! Ta bèrdat ku Mariadal, entre otro den publikashon via prensa i medianan sosial, a anunisá ku a sera botika na hospital ‘temporalmente’.

Pero ta niun ratu so, e Fundashon no a sali splika kiko tabata e konsekuensia di esaki. Laga para ku a hasi esaki ‘regularlmente’. Tampoko a tuma e molèster pa informá kliente ku e hospital tabata sigui será, i ki día por a spera su reapertura, òf ku a kambia sierto prosedura ku lo a afektá esun ku tin ku pasa buska su remedi.

Otro kriterio pa un komunikashon korekto ta, ku esaki mester sosodé na tempu. Aki tambe Fundashon Mariadal a faya! Ta te den e komunikado di djadumingu 27 di mart, Fundashon Mariadal ta komuniká ku ya ta ‘pa spèk en boon’ dòkter di kas ta puntra pashènt unda, o sea pa kua botika, ke pa manda e reseta.

“Ta na e dòkter di kas pa disidí si e ta hasi uso di e servisio di bode òf ku e kliente mes mester buska su resèpt serka e dòkter di kas. Durante e seramentu temporal a hasi un adaptashon na esakï” asina Mariadal ta skibi”. Ke men: a trese kambio den esaki, sin ningun momento no a avisá kliente ni pashènt ku e remedi ta wòrdu prepará na momento ku e kliente ta bin tuma esaki na botika. Mayoria hende no tabata sa esaki mes!

Pero pa hasi e kos aún mas pió, ta bira kulpa e kliente! “For di investigashon a resultá ku kada luna entre 70 pa 120 pashènt no tabata bin tuma e remedinan ku a prepará pa nan. Esaki tabata kondusí na inefisiensia pa loke ta trata tempu, ku bista riba e retonan menshoná akí riba relashoná ku personal. Pa e motibu akí a skohe pa prepará e remedinan na momentu ku e kliente bin tuma su remedina”, asina Mariadal ta skibi.

Ku otro palabra: No ta boso inefisiensia, boso falta di komunikashon, boso falta di sufisiente empleado i boso seramentu di Botika di Playa ku a kondusí na e echo ku pashentnan tabata tin ku warda hopi, pero TA FALTA DI E KLIENTE, pasombra tin 70 – 120 hende pa luna (!!) ku no tabata pasa buska nan remedi. Puntra bo mes ki porsentahe e 70 – 120 hende pa luna ku no tabata buska nan remedi tabata representá. Mi ta tribi di bisa ku esaki no ta mas ku 1 à 2% di e total na pashènt ku tabata buska remedi tur luna.

Mi ta bolbe bisa ku ta aploudí si Fundashon Mariadal kuminsá komuniká mas, pero nan tin un par di kos sí di siña ainda: Sòru pa bo komuniká na tempu, i sòru pa bo ta honesto. Kaminda ku abo tin e fout, asumí esaki, i no bira kulpa esun ku ta sufri bou di bo mal prestashon òf mal maneho.