KRALENDIJK- Un konferensia organisá djasabra atardi pa anochi na Plaza Resort Bonaire pa e Fundashon Akademia pa Papiamentu a resultá hopi eksitoso. 

E konferensia tabata bon bishitá i tabata konosé diferente oradó, manera profesornan Martha Dijkhoff, Joana Duarte i e eksperot portorikeño Nicholas Faraclas. Kada un a trese sierto aspekto di a materia dilanti. Duarte a papia tokante e bentaha ku siñamentu di vários idioma, banda di otro, ta trese kuné. 

Estudionan, entre otro na Hulanda, a mustra ku muchanan ku ta haña lès den tres idioma banda di otro, esta Hulandes, Frisiano i Ingles, tin resultadonan eskolar mihó ku esnan ku ta haña lès na Hulandes so. 

Tambe a papia di Papiamentu komo un asina yamá idioma di matreks, o sea un idioma ku ta fasilitá i ta invitá pero ku no ta imponé dor di otronan, manera un idioma di un kolonisadó sí ta. Tur tres eksperto ta di opinion ku e echo ku mayoria hende na Boneiru ta papia kuater idioma un bentaha grandi. 

Akuerdo

Ruben Severina a duna un bista di e palabrashonan ku a keda hasí entre gobièrnu di Hulanda i di Boneiru pa loke ta trata promoshon di papiamentu i -riba termino mas largu- un protekshon ofisial di e idioma. 

Banda di e presentashonnan, poeta Ini Statia, yudá pa Jackie Bernabela, a haña hopi apoyo pa su poemanan ku e ta skibi na 3 idioma pareu: Papiamentu, Hulandes i Ingles. 

E diskushon entre e panel di eksperto i e públiko presente tabata hopi interaktivo, pero debí na e tempu mester a klousurá e anochi. 

Presidente di Akademia di Papiamentu, Elsmarie Beukenboom a habri i a sera e konferensia. “Mi ta hopi kontentu ku e kantidat di hende ku a presentá i tambe e kontenido di e lokual ku nos a skucha awe. I esaki ta djies e komienso di tur kos ku nos ta trahando riba dje”, asina Beukenboom a bisa.