Kralendijk- Fin di aña 2023, Terramar Museum lo kuminsá un proyekto nobo en kolaborashon ku Universidat Utrecht ku e sosten di Fonds voor Cultuurparticipatie. Hunto ku investigashon arkeológiko, investigashon sientífiko i desaroyo di komunidat, nos ta pone klaro ku herensia ta bibu den Boneiru su habitantenan.

Terramar Museum i Universidat Utrecht lo uni forsa pa krea un proyekto patrimonial partisipio aktivo ku e ophetivo di konektá habitantenan di Boneiru ku nan herensia tangible i intangible. Pa e proyekto aki, Terramar Museum lo traha pa konkretisá kolaborashon ku organisashon nan lokal yegando na tur esnan interesá den herensia i tur ku ta partisipá den herensia. Lo krea diferente eventonan patrimonial kaminda e grupo di enfoke ta e Boneriano lokal.

Di e kolaborashon i investigashon aki lo realisá un kolekshon móbil. Un storia nobo, un kolekshon nobo kaminda un perspektiva diferente lo konta e storianan di Boneiru, e kolekshon lo ta aksesibel pa henter e isla. Otro punto di enfoke prinsipal di e kolekshon ta ku lo brinda e oportunidat na diferente organisashon ku lo por presentá e kolekshon serka nan.

E kolekshon lo konsentrá riba 23 opheto, 23 opheto ku lo konta e konekshon entre opheto, herensia i habitante. Terramar Museum lo konektá e eksperiensia i historia personal di e ophetonan. E kolektashon di e ophetonan lo realisá por medio di konosimiento i método nan di kultura i investigashon históriko i arkeológiko.

Nos ta hasi un yamada na tur organisashon i persona interesó pa partisipó, no duda di tuma kontakto ku nos. Nos ta den e fase inisial i nos lo deseá di risibí sugerensia di tur!