Kralendijk- Kuerpo polisial ta informá ku wikènt tras di lomba KPCN i KMAR, den kolaborashon ku partner di kadena JICN, a kontrolá riba kumplimentu ku e medidanan vigente di e ordenansa di emergensia ku a drenta na vigor djabièrnè 5 di mart entrante 6 or i atardi.

Polis a konstatá ku, no opstante e medidanan nobo aki, tabata basta drùk na snèknan, na algun establesimentu di hòreka i riba bichnan. Riba bich tin biaha tabata trata di grupo di deportista akuátiko òf famianan/gruponan ku tabata deklará  di ta forma parti di un kas di famia.

Mayoria biaha e personanan aki tabata kumpli ku regla, pero esaki no ta kita ku e riesgo pa mas kontagio ta keda eksistí. A detené un hòmber di inisial O.R.M.V. di 20 aña durante un di e kòntròlnan en konekshon ku e no tabata kumpli ku e Lei di Identifikashon.

Un tim multidisiplinario, ku ta konsistí di KPCN,  direktorado di supervishon i Mantenshon di Entidat Públiko i Stinapa, lo sigui kontrolá e periodo benidero i si ta nesesario, duna but.

Tuma responsabilidat

Sinembargo KPCN ta di opinion ku, sigur mirando e kantidat di kasonan, mas organisashon i habitante òf turista mester tuma nan responsabilidat. E enfoke no mester bai kai solamente riba mantenshon. Ta di gran importansia pa un i tur pa prevení mas kontagio ku ta trese kuné un riesgo mas grandi pa esnan mas vulnerabel den nos komunidat.

P’esei un biaha mas KPCN ta hasi un yamada na un un tur pa tene nan mes na e reglanan di e ordenansa di emergensia.

---

Lesa tambe:

• 
  Por deskubrí historia di antepasadonan ku e buki ‘Archivo Spièrtá’
• 
  ZJCN ta introdusí mehorashon den seguro médiko pa islanan BES 
• 
  Marco van de Kreeke bèk na aeropuerto Flamingo komo di dos direktor 
• 
  Otro charla mas pa mayornan tokante uso seif di medionan sosial serka mucha
• 
  Entrega di Kalènder 2025 “Ban Topa Nos Grandinan” na Gezaghèber John Soliano