KRALENDIJK – Fundashon Plataforma Kultural ta bai duna lès di muzik grátis atrobe pa grandinan na Boneiru. E fundashon ta ofresé for di 13 di sèptèmber lès pa prinsipiante pa kuarta (instrumento di kuèrdè) i klafir di boka. Ámbos ta instrumento di folklor i ta toka nan pa hopi tempu kaba na Boneiru.

Dosentenan profeshonal di músika ta duna e lèsnan na Hòfi Kultural. E lèsnan di kuarta pa prinsipiante ta riba djarason mainta di 9’or pa 10’or i ta na enkargo di Francis Domacassé. E lèsnan di klafir di boka pa prinsipiante ta riba djarason mèrdia di 3’or pa 4’or i Franklin Scherptong ta e dosente.

Tin posibilidat pa fia un kuarta na Hòfi Kultural pa e lès di kuarta. Si bo ta bini e lès di klafir di boka, bo lo mester bini ku bo mes instrumento (klafir di boka den tono C). Pronto nan ta optenibel atrobe na Boomerang Hardware.

Fundashon Plataforma Kultural ta duna lès di muzik pa hopi aña kaba. Hòfi Kultural ta e ‘sala’ di Fundashon Plataforma Kultural.  E aktividatnan ta tuma lugá pafó bou di e palapa grandi. Hòfi Kultural ta situá na Kaya Skandèlchi na Antrio Pabou. E lèsnan ta grátis i no tin nodi di registrá delantá.

Pa mas informashon por wak riba 

www.hofikultural.com/eventsathofikultural  òf yama Mieneke van Rossem na telefon +599 7864233.