WILLEMSTAD – Vernond Rombley, nasé na Boneiru, a wòrdu kondena na aña 2016 na un kastigu diessinku aña di prison pa un atrako armá ku a tuma lugá na Kòrsou.

Awe, Rombley a wòrdu liberá despues di sirbi dos terser parti di su kondena. Ta trata di un liberashon kondishonal. E kaso di revishon ku e abogado mr. Geert Knoops a presentá pa revoká kondena original di Rombley, ta kanando su proseso ainda.

E kaso di Rombley a hala hopi atenshon, pasobra for di kuminsamentu e a keda para riba su inosensia den e kaso di atrako konserní. Den su petishon pa revishon, a presentá prueba nobo ku segun Rombley ta mustra ku e a keda sentensiá inhustamente na su kastigu.

Korte di apelelashon na Kòrsou a indiká ku Instituto Forénsiko Hulandes (NFI) mester investigá si tin hecho nobo ku ta hustifiká revishon di e kaso. Pero ainda no a yega un desishon tokante esaki.

Falta di prueba

Abogadonan di Rombley a argumentá ku e prueba den e kaso original kontra di nan kliente tabata insufisiente, i ku e kondena tabata basá riba análisis forénsiko inkorekto, i deklarashonnan di testigo.

E kaso di revishon ta enfoká riba korekshon di e posibel erornan aki.