KRALENDIJK- Casa de Músika, huntu ku gobièrnu di Boneiru SKAL, a trese e maestro Hector Sampson Boneiru, pa por a duna un workshop. Ta trata di un workshop pa tur trompetista i tambe trombonista. 

Mester bisa ku un kantidat di 6 trompetista i 5 trombonista a partisipá na e workshop, ku sigur tabata un tremendo idea. E workshop a kuminsá djabièrnè 13 di mei, unda Hector a dediká tempu, kon mester kalentá promé ku toka e instrumènt. Despues  Hector a kuminsá hinka 3 kansion den otro, ku a keda presentá riba djadumingu 15 den Parke Wilhelmina. 

Sigur mester bisa ku e tipo di aktividatnan aki, mester tuma lugá ku mas frekuensia, ya Boneiru tambe su kalidat di hendenan ku ta supla trompèt i trombon, por subi, di manera ku Boneiru por tin su propio supladónan. Sigur riba un bon nivel i ku por toka ku kualke banda ku nivel haltu. Sigur mester felisitá e organisadónan, sinembargo tambe e partisipantenan i espesialmente  Maestro Hector, kende a sa di duna tur loke e tabata por, pa un bon presentashon djadumingu atardi. 

Kontentu

Na e okashon den Parke Wilhelmina, Papito Thomas, hefe interino di SKAL a papia. “Ta di apresiá e workshop pa trompetistanan. Nos di SKAL ta kontentu ku e tipo di proyektonan aki i spera e ta sigui desaroyá.   

Hector Sampson, a bisa despues di a konta un idea ku a kuminsá na Kòrsou i a bira algu grandi. “Mi ke hasi hopi pa Boneiru, importante ta; mester trein ku e instrumènt tur dia. Tròmpèt no ta manera otro instrumènt. E ta rekerí hopi práktika.” 

Diputado Nina den Heyer tambe tabata presente i a aploudí e grupo di supladónan, durante nan presentashon den e Parke.