Den Haag- Minister di defensa na Hulanda, Ank Bijleveld (CDA) djabièrne atardi (tempu di Hulanda) a entregá su posishon.

E renunsia di Bijleveld, ku un tempu tabata sekretario di Estado den preparashonnan di 10/10/10 tin di haber ku e debakle pa saka hende for di Afganistan, na momentu ku Taliban a tumba e gobièrnu di e pais.

Promé ku Bijleveld, minister di Asuntunan Eksterior, Sigfried Kaag a renunsiá pa mes motibu, despues ku parlamentu hulandes a pasa un moshon di desaprobashon kontra di ámbos Kaag i Bijleveld. Bijleveld na e momentu ei, no ker a renunsiá ainda.

Diskushon

“Mi a ripará ku e desishon aki a bira tópiko di diskushon anto asina aki si mi no por sigui funshoná”, asina Bijleveld a bisa. E minister a bisa tambe ku e no kere a renunsiá pa por sigui traha huntu ku tur hende den defensa. “Ku doló den mi kurason, mi ta bai laga nan”, asina Bijleveld a bisa.