KRALENDIJK- Segun pader Ivan Dario Gomez ta bisa, misa di Rincon mester di yudansa di hóbennan. Gomez a ekspresá esaki den kuadro di selebrashon di Simandan di pastó.

E simadan a tuma lugá djaluna di dos dia di Pasku den Rincon i tabata dediká na Veronica (Ronnie) Mercera. Pastor Ivan na e okashon a papia di un ‘gran señora’ ku ta meresé e rekonosementu, un muestra di kariño i gratitut pa loke e ta hasi. 

Momentu ku pader Ivan a entreg’é un plaka di mérito, el a presentá algun palabra pa tur presente. “Mi ta spera e Pasku aki, ta trese hopi kambia pa nos tur. Ta un tradishon ku hopi aña a organisá esta e simadan di pastó. Mi no a pensa riba algu manera awe, ku nan lo pone mi den lus. Mi a keda bon sorprendí. Mi no ta hasi kos pa haña rekonosementu. Pero mi ta apresiá masha. Mi ta spera hende pa yuda ku kosnan di misa. Parokianonan ban huntu, spesialmente nos hóbennan, ban traha huntu na kas di Señor. Mester di boso koperashon. Dios bendishoná tur presente”.

Petishon

Pader Gomez a hasi 3 petishon tambe na e presentenan. “Mi tin 3 kos ku mi ke pidi tur hende. Unu, mi ta pidi tur hende, manehá ku velosidat kontrolá. Kaminda no ta malu, hende ta kore inkorekto. Dos, lanta boso yunan ku bon manera. Edukashon i disiplina ta hopi importante pa un bon komunidat. Tres, hóbennan, misa mester di boso yudansa i sigur nos hóbennan!”