E misterio rondó di e barku ku a senk na Tobago ta keda sin solushon awor ku outoridatnan no a logra identifiká e doño. E insidente ku a sosodé dos siman pasá i ku a okashoná un desaster di medio ambiente, ta rondoná pa misterio i ta hañando forma di un pelikula ku suspenso segun schippersmagazine Schuttevaer.

E barku ku yama Gulfstream a senk i un kantidat grandi di zeta a lèk den laman Karibe, ku konsekuensia ku gobiernu di Trinidad i Tobago a deklará estado di emergensia. 

E lèkashi di zeta a afektá Boneiru tambe, kaminda a konstatá polushon di zeta den diferente bahia i riba playanan. Esaki ta forma un menasa serio pa tantu hende komo naturalesa, inkluso ekosistemanan delikado manera palu di mangel, piská i koral. Apesar di esfuersonan pa para e zeta, dunadónan di yudansa ainda ta deshasiendo di e sushi.

Tou

For di investigashon a sali na kla ku for di dia ku e toubot Solo Creed di Panama a tou e barku ku a senk, el a disparsé sin laga niun marka atras. Ámbos barku a desaktivá nan Automatic Identification System (AIS) pa bo no por detektá nan.

Bellingcat a revelá ku e barku di karga tabata den mal kondishon promé ku el a pone rumbo for di Panama pa Venezuela i despues Guyana, kaminda finalmente el a bòltu banda di Tobago. Den besindario di e karkas a haña pakinan di droga, loke ta fortifiká e sospecho ku e transporte di zeta posiblemente tabata un enkubrimentu pa kontrabanda di kokaina.