KRALENDIJK – Esaki lo tabata un di e simannan mas pisá ku el a eksperensiá komo gezaghebber interino. Djaluna Nolly Oleana a haña tende ku tin zeta a drif bin kosta na parti ost. A sigui un siman agitá. Djabièrnè tur playa a habri bèk atrobe. E gezaghebber a laga sa: “Nos a skapa di un desaster grandi”.

Den e reportahe di NOS di djasabra 2 di febrüari Oleana a laga sa: ‘Boneiru a skapa di un desaster’. I bèrdat, esun ku a sigui notisia for di djaluna tokante e krísis di zeta na Boneiru, por konkluí ku Boneiru a skapa di lo peor. Zeta a yega na kosta parti ost i a susha partinan grandi di kosta i playanan. A haña un kantidat di para i piská morto.

Oleana a spanta djaluna. El a reakshoná: “Mi a spanta ora mi a mir’é. Mi a pensa, esaki ta komienso di hopi problema. Mi ta hopi satisfecho ku e trabou ku mi a mira di tur hende. Mi no a fèrwagt nunka ku nos lo por a deshasí asina lihé di tur e fiserei. Mirando bèk e daño a resultá menos ku e tabata parse”.

Spantu na Sorobon

Caesar Finies ta un di e gerentenan di Jibe City na Sorobon. El a bisa: “Djamars mi a spanta ku lo tabatin hende den awa. E tipo di kosnan aki nos a yega di eksperensiá anteriormente kaba. Pero pasobra e biaha aki hopi a drenta den un solo biaha, nos a skucha di gobièrnu. E komunikashon ku nan a bai bon. Tur dia pa 2’or di mèrdia tabatin un konferensia di prensa. Esei a bai hopi bon”.

LVV, brantwer, STINAPA, OLB i asta ehérsito a intervení. Nan a purba tur ku tin di deshasí di e zeta riba e playanan. Na Lac e zeta tabata drif bini  paden. Pero te ku dia di awe ta parse ku a prevení un desaster di naturalesa einan. Empresanan na kosta ost mester a sera tres dia, pero nan tambe a habri djabièrnè atrobe.

No tin zeta nobo 

For di djabièrnè e playanan di Sorobon ta habrí atrobe. Bo por a ripará esei, pasobra tabata masha drùk. Hopi hende a bai laman.  Parse ku gran parti di e zeta no t’ei mas. Finies tambe ta bisa ku e tambe ta haña seif pa bai Sorobon atrobe: “Mi no a haña rasgunan nobo mas di zeta. Ni aki i tampoko na fin di e playa”.

Traha ku koutela 

Apesar di e alivio pa baidónan di laman, pueblo di Boneiru i e empresanan na Sorobon, mester bai ku koutela. Segun Oleana no ta konosí ainda si tin zeta nobo ta  drif bin direkshon di Boneiru: “E senarionan tabata mustra ku e lo a pasa parti nort òf sùit di e isla. Nos a pensa ku nos lo a haña un tiki zeta. Tòg nos a hasi un kalkulashon robes. Durante e National Hurricane Conference aña pasá na Merka nos a siña ku nos mester ta masha kouteloso ku duna informashon òf konseho, pasobra e por krea pániko i problema. Di meteo Merikano mi a komprondé ku bientu por a bòltu fin di siman pasá. Esei lo por tabatin konsekuensia atrobe pa e isla”.