Bou di e riesgo ku sierto hende lo por tildá mi di no komprondé kon kos ta funshoná den politika i den gobernashon, mi ta tribi tòg di puntra mi mes, na kiko e trip di tur miembro di konseho insular, hinter Kolegio Ekekutivo i un kantidat di amtenar haltu na hulanda lo trese kun’e pa e siudadano komun. 

‘Wat a week’, asina Diputado Nina den Heyer a publiká djadumingu atardi riba su página di Feisbuk, ku un 20 pòtret di yen momentu ku a tuma lugá durante e siman aki. Un eksibishon tokante sklabitut na Groningen, e kongreso di VNG, kombersashonnan ku parlementarionan hulandes, selebrashon di e Keti Koti Festival na Amsterdamn i yen aktividat ku Boneriano bibá na Hulanda. Masha great, por sierto!

Loke tambe por nota ta diferente pòtret, no tur riba Feisbuk di Den Heyer, di un Kolegio Ehekutivo kompleto ku tur tres diputado i gezaghèber, tur na smail. Huh? No tabata tin gran pleitu den BC pa mas ku un luma kaba, te ku mester a buska un mediadó eksterno pa purba plakia kos?!

Pero durante e ‘schoolreisje’ pa Hulanda (pagá ku sèn di pueblo?) por ripará nada di tenshon interno den Kolegio Ehekutivo, ni tampoko entre esnan ku ta sostené gobièrnu i esnan supuestamente di oposishon. Manera Clark Abraham i Daisy Coffie. Nan tambe ta sali ku smailnan asina grandi riba nan kara, huntu ku koleganan di UPB i MPB. 

Tur e smailnan den e diferente pòtretnan ta sugerí, aloménos, ku -aunke sea leu for di tera Boneriano- nos polítikonan a sa di yega na akuerdonan importante pa nos isla. Manera, ki ora ta bai publiká resultadonan di investigashon tokante Rotonde, kiko ta bai hasi ku e pèrmit pa Sunset Beach Resort, un manera pa drei bèk subida drástiko di koriente ku 30%, i un plan pa kumpra Plantashi Boliva bèk pa evitá ku e área balios aki ta bai wòrdu desaroyá di forma deskabayá.

Si mi ta tribi di ser aún mas optimista, mi ta imaginá ku a logra tambe un kombenio ku ministernan na Hulanda kon tei baha preis di pasashi pa biaha pa nos islanan ruman, kon pa yega na un penshun adishonal pa nos siudadaonan ku no tin ekaki, mihó servisio di parti di ZVK, i implementashon sin mas tardansa di e ‘minimo sosial’!

Ya mi ta skucha e bosnan di e mesun kontrikante di semper, ku ta bisa ku tur e lokualnan ku mi a kaba di menshoná ta un ilushon grandi di mi parti. Pero kon por ta? Ta na kiko e ‘Wat a week’ a kondusí anto??

Na tur siudadano krítiko, mi ke hasi un apelashon pa tene un tiki pashensi. Aunke ku no a duna niun sorto di informashon tokante e ‘schoolreisje’ aki promé ku a biaha bai Hulanda na bòshi, mi tin sigur ku pronto lo bin konta pueblo, pa kiko a biaha pa hulanda a tuma lugá, i kiko konkretamente a logra pa nos komo siudadano. 

Pasombra -realmente- mi no por imaginá mi ningun momento só, ku tur miembro di Konseho Insular, tur Diputado, gezaghèber i un kantidat bastante grandi di amtenar a biaha bai Hulanda pa mas ku un siman, sin ku esaki a kondusí na logronan importante pa e poblashon di Boneiru. 

Mi ta spera ku tur hende, inkluyendo tur esnan ku a biaha, ta di akuerdo ku mi i pronto lo por bin konta, sea na radio, televishon òf den konferensia di prensa, kiko a logra pa nos, komo siudadano komun i koriente, di e isla aki!