Kralendijk – Tin un dicho na Hulandes ku ta bini di un forma antiguo Germano pa tuma desishon. Na momentu ku partidonan mester parti algu un di nan ta parti’é pa despues e kontrapartido mag  skohe su parti promé. E meta ta ku e partido ku ta parti ta drenta den e mundu di e partido ku ta skohe i ta bai  ku e interesnan di ámbos partido. Pues tuma òf laga para!

Ya pa basta tempu kaba Den Haag ta insinuá pa monopolisá kuido di laboratorio na Boneiru. Ministerio di Salubridat, Bienestar i Deporte [VWZ] ke alohá kuido di laboratorio kompleto bou di Fundashon Mariadal i konsekuentemente no finansiá BONLAB mas, ku ta tuma riba dje kuido primario di laboratorio.

For di negosashon di e delegashon di Boneiru, konsistiendo di e Diputado enkargá ku Salubridat Públiko, lidernan di tur frakshon ku ta representá den Eilandsraad i na nòmber di sekretario di Estado di VWS, e Direktornan di ZJCN, ta bini dilanti ku e kabinete ta apliká dos kriteria sentral. VWS ta husga ku den kuido di laboratorio na Bonaire por papia di ekseso di kapasidat  i konsumo eksesivo pa loke ta trata kuido (di laboratorio). Segun argumentu di VWS nan ta yega na e konklushon aki siguiendo e normanan pa kuido ku ta komun i koriente na Hulanda. Laga nos pone e huisio aki na prueba.

Na promé lugá, kon por papia di ekseso di kapasidat si ta kompensá BONLAB solamente pa ‘prestashon’? Ta paga BONLAB solamente na momentu ku un asegurado presentá riba petishon di un dòkter di kas pa laga hasi un tèst, pues solamente pa servisionan médiko ku realmente a duna. Si no tin demanda, VWS tampoko no tin gastu. Esei ta sin e nesesidat pa duna ‘respaldo’ pa kontinuidat di kuido di laboratorio na momentu ku e laboratorio di hòspital di Fundashon Mariadal pa motibu di krísis (médiko) òf kua otro motibu no por duna servisio di laboratorio.

Awor e huisio di konsumo eksesivo. VWS ta di opinion ku na Boneiru tin mas demanda pa kuido ku loke na Hulanda ta komun i koriente segun e normanan. Esei no ta asina sorprendente, pero VWS mes ta kontestá. Pasobra, riba e sitio wèb di Rijksinstituut voor Volksgezondheid en Milieu di VWS ta deklará lo siguiente bou di e página ‘Sifra i echonan tokante e relashon entre pobresa i salú’, i mi ta sita “Muchanan i hóbennan ku ta biba den pobresa tin mas keho físiko i mental ku su kompañénan ku moda di e mésun edat………….   Adultonan ku ta biba ku problema di sèn, debe òf pobresa tin strès króniko mas frekuente, un stail di biba no saludabel òf malesanan króniko manera diabétis i problema ku kurason”.  Pues, VWS ta konsiente ku pobresa tin un influensia direkto riba salú i pa e motibu ei ta orígen di un nesesidat di kuido mas haltu.

Awor ta asina ku pa años kaba Den Haag ta na altura ku na Boneiru ta reina pobresa eksesivo sigur mas haltu ku ‘Normanan Hulandes. Sinembargo Ministerio di Asuntunan Sosial i di Trabou [SZW] ta nenga di fiha un Mínimo Sosial aseptabel, ku konsekuensia ku ta keda mantené pobresa polítikamente na Boneiru. 

Pues, resumiendo, maneho di Den Haag ta tene e mínimo sosial bou di normanan Hulandes, ku konsekuensia ku ta mantené pobresa na Boneiru i ta okashonando un demanda di kuido mas haltu, i ku Hulanda ta konstatá ku e demanda di kuido na Boneiru ta mas haltu ku e norma Hulandes i ku pa e motibu ei nan ta husga ku mester kòrta den den e suministro di kuido. Bo por sigui’é ainda?

Ta parse ku e Kabinete ke tuma i alabes laga para. Pregunta ta unda e interes di Boneiru a keda den esaki!

Clark Abraham

Partido DEMOKRAT

Lider di Frakshon