KRALENDIJK – Djamars a tuma lugá e firmamentu di e kontrato kolektivo di trabou (CAO) pa empleado di Fundashon Krusada. 

Despues di a rekonosé di forma boluntario sindikato AFBW komo e úniko representante di e empleadonan, negosashon pa un promé CAO a kuminsá mesora. 

Samantha Portugies, direktor di Krusada a felisitá e empleadonan di e fundashon ku e logro aki. Alabes Portugies a yama danki na AFBW pa e manera ku negosashonnan a kana, na konseho di supervishon di Krusada i na konseheronan di Linkels & Partners, ku a guia e proseso di negosashon.

Presidente di AFBW, Cherrel Kwidama, na su turno tambe a felisitá e trahadónan di e fundashon i a yama danki na e tim negoshadó, e shopstiwartnan di Krusada, Linkels & Partners i konsehero di AFBW Norwin (Nòchi) Willem. 

“Nos ta hopi kontentu ku Krusada a mira e importansia di negoshá un CAO pa e empleadonan. Krusada tabata tin su personeelshandboek i tambe reglamentu interno, pero un CAO, komo kontrato kolektivo ta di un órden mas haltu. E ta un dokumentu legal ku tur dos partido tin ku tene su mes na dje”, asina Kwidama a bisa. 

Benifisio

Ambos Portugies ku Kwidama a mustra ku empleado, pa medio di e CAO ta bayendo hopi dilanti. Asina tin awor bono di fakansi, un di 13 luna, indeksashon i otro benefisio hinká den e kontrakto kolektivo.