Preokupashon pa kontagio skondí

Kralendijk- Mientras ku e kantidat total di kaso aktivo na Boneiru ta sigui baha, tòg tin preokupashon ku e sifra bahando no ta konta tur kos.

Spesífikamente tin un preokupashon ku e kantidat di hende ku ta bai tèst a bira ménos i no nesesariamente e kantidat di kontagio riba su mes a bira ménos.

Awe 30 di mart 2021 tin 355 kaso aktivo di Covid-19 na Boneiru. Di e 75 resultadonan di tèst ku a drenta, 27 a resultá di ta positivo. 43 hende a rekuperá di Covid-19. En total tin 18 persona den hospital. Tin 16 persona hospitalisá na Boneiru, bou di nan tin 5 ku ta haña kuido intensivo. Tin 1 persona den hospital na Kòrsou i 1 persona ta den hospital na Aruba. 

Porsentahe

Algo positivo riba su mes ta ku e porsentahe di hende ku ta tèst positivo tambe ta kuminsá baha levemente. Esaki tabata 36% pa ayera, mientras ku pa algun tempu kaba esaki ta varia entre 44 i kasi 50%. Esaki ta muchu mas haltu ku ta e kaso na por ehèmpel Kòrsou.