KRALENDIJK- Pronto ta bai tin Siman di Buki na e islanan Aruba, Boneiru i Kòrsou. Pa di promé biá Boneiru ta introdusí su promé buki di regalo ‘geschenkboek’ na e muchanan.

E buki akí ta un regalo pa muchanan di Boneiru en konekshon ku Siman di Buki 2023. Esaki riba enkargo di Direktorado di Komunidat i Kuido, Direktorado di Edukashon i Bienestar i SKAL.

Apertura di Siman di Buki ta djadumingu 12 di novèmber na Biblioteka Públiko Boneiru. Tema di Siman di Buki e aña akí ta ‘Na mi kas’.

E buki di regalo Fakansi den pasado, ta skirbí pa Giovanni Gijsbertha. Despues di a asistí na un tayer básiko di skirbi kuenta na Boneiru, Fakansi den Pasado ta su promé publikashon. E buki ta publiká pa editor Denise de Jongh-Rekwest, via Request Publishing.

E buki ta dushi pa lesa pa e mucha por tende for di grupo 4. E ta bon pa mucha di 9 pa 12 aña mes lesa. E kontenido di e kuenta ta interesante. Tambe e muchanan ta siña hopi di kustumber di ántes i kultura di Boneiru.

Presentashon

Resientemente Giovanni Gijsbertha i Denise de Jongh-Rekwest, a hasi entrega di e promé eksemplar di Fakansi den pasado na Diputado James Kroon, den presensia di gerensia di Direktorado di Komunidat i Kuido i SKAL.