Informacion reciente ta enfatisa e alarmante desaroyo di e coral blanco invasivo, Unomia stolonifera, cu actualmente ta devastando e ecosisteman marino di Venezuela y cu a keda detecta na Cuba. Cu e menasa potencial di su expansion pa e islanan di Caribe (Hulandes), accion urgente y conscientisacion ta esencial pa salvaguarda biodiversidad marino y economia local di posibel consecuencianan catastrofico. 

Especienan invasivo ta animalnan of matanan di otro region di mundo cu no ta pertenece den nan ambiente nobo. E especienan aki por tin efecto ecologico grandi door di destrui flora of fauna nativo. Nan por causa tambe perdida economico grandi y nan por influencia salud humano. Especienan invasivo ta un menasa grandi tambe pa e ecosisteman marino mundialmente, incluyendo Caribe Hulandes. Entre e invasornan aki tin e especie octocoral Unomia stolonifera of “Pulsing Xenia” , originalmente for di Indo-Pacifico. Cu su crecemento rapido y falta di predadonan natural, e especie aki por surpasa especianan nativo y kibra habitatnan marino fragil manera cama di yerba marino y rif di coral. 

Background 

E coral invasivo suave U. stolonifera a ser identifica pa prome biaha na aña 2014 banda di costa di Venezuela. Nan ta kere cu el a keda introduci via negoshi ilegal di acuario. Ya cu e especie aki por reproduci sexualmente y no sexualmente (of fragmento), hasta pida chikito por regenera pa plama. Unabes cu el a keda introduci, el a tuma posicion rapido di e rifnan poco profundo y substrato duro na profundidad di 0-50 meter, door di cua el a core cu e coralnan local y mata di lama pa keda cu e espacio. Door di investigacion haci despues a haya sa cu e especie di coral aki tabata tin un porcentahe promedio di 80% di cobertura, hopi mas halto cu e coralnan nativo. Den e areanan hopi colonisa, pisca ta desapareciendo pa motibo di perdida di habitat. 

Na aña 2022, durante un investigacion cu a tuma luga na Cuba door di Universidad di Havana, a descubri un octocoral desconoci cu despues a wordo identifica como e invasivo Unomia stolonifera. Ta sospecha cu e larvanan di coral a yega den awa di balast for di e barconan di combustibel cu a sali for di Venezuela, ya cu e sitionan cerca di e portanan Venezolano a wordo afecta hopi pa invasion. 

Con pa yuda 

Prevencion pa medio di monitor continuamente, specialmente den e areanan di riesgo halto manera hafnan marino y facilidadnan petrolero, ta di sumo importancia. Deteccion tempran ta hunga un rol importante den mengua e menasa cu Unomia stolonifera ta trece. 

Participacion y conscientisacion di publico ta di vital importancia. Ta urgi e comunidadnan local, e buceadonan recreacional, turista y tur stakeholder pa participa den e esfuersonan di deteccion trempan door di raporta loke bo observa (potret, luga y fecha) di e coral invasivo aki na nan respectivo – Protected Area Management Organisation (PMO) –Fundacion Parke Nacional Aruba (FPNA), STINAPA Bonaire, CARMABI Curaçao , Saba Conservation Foundation (SCF), Nature Foundation St. Maarten (NFSXM) and St. Eustatius National Parks (STENAPA). Si ta confirma cu tin un area invadi, mester sigui e recomendacionnan di e PMO local. Con pa logra a pesar di e retonan, deteccion tempran ta clave pa mengua e menasa cu Unomia stolonifera ta representa. Cu vigilancia continuo, investigacion, y encuentro comunitario, tin speransa pa controla e problema potencial aki prome cu e bira un menasa grandi.