Kralendijk – Elsmarie Beukenboom i STINAPA a bolbe kuminsá ku proyekto di reforestashon riba Klein Bonaire. Shete aña pasá tabata delaster biaha ku a planta palu riba e isla protehá aki.

Huntu ku boluntario, trahadónan di parke marino i militarnan hulandes Beukenboom a traha e último dianan riba Klein Bonaire preparando e área pa por planta palu ora temporada di yobida kuminsá atrobe.

Beukenboom ta konta kon bin el a disidí di bolbe kuminsá planta riba Klein Bonaire: “Algun luna pasá mi tabata riba Klein Bonaire pa stroi shinishi di defuntu Paul Hoetjes. E tabata stima e palma kabana masha tantu. Na e seremonia di tira shinishi ei a planta diferente mata i tambe kabana. Durante e seremonia mi a haña inspirashon pa planta un mondi di kabana riba Klein Bonaire.”

“Den e mes temporada a drenta resultado di investigashon tokante kabana. Ta resultá ku aktualmente tin un kantidat hopi bou di e palma adulto den naturalesa. Tambe resientemente ekspertonan di palma a deklará e kabana di Boneiru komo palma endémiko di nos isla. E ta un palma hopi úniko pues i e ta kore riesgo ku e por disparsé. Mas  motibu pa planta e mondi riba Klein Bonaire. Un isla protehá na unda e palmanan por ta protehá pa semper” Beukenboom ta terminá kontando.

El a aserká STINAPA ku su idea pa pidi pèrmit pa por planta mil palu di kabana. STINAPA a respondé masha entusiasmá ku e idea i nan a kuminsá plania e proyekto huntu.

Ayudo militar

Djárason i djaweps pasá a hasi uso di militarnan hulandes ku a bin Boneiru pa ensayo. Diessinku hòmber a yuda Beukenboom riba Klein Bonaire huntu ku algun boluntario i trahadó di STINAPA. Huntu nan a limpia e pos ku ta bai usa den e proyekto. A saka masha hopi kokolishi, piedra i santu for di dje. A limpia e pos te un profundidat di un meter. Despues a kuminsá traha sitio pa por planta palu. E área ta piedra só. Ku barete a bòltu piedra i e buraku ku keda lo yena ku tera pa planta e matanan. Un trabou hopi duru. Konsiderando kuantu esfuerso tin di hasi pa krea sitio pa planta e palma i tambe kon brutu e área ta ku baranka di piedra punta skèrpi unda lo tin di kana pa dos aña pa muha e matanan un pa un, Beukenboom a bira mas realista i lo konformá ku e sinkushen burakunan ku a logra traha den e dos dianan aki.

Sinkushen

E mondi di kabana lo bira di sinkushen palma. Di eksperensia sa ku 60% di e matanan resien plantá ta muri. Pues na final e mondi di kabana lo ta di masoménos dosshen palma.

E plan ta pa kuminsá hinka mata abou den òktober. Nèt promé ku temporada di yobida kuminsá.

E promé proyekto di reforestashon ku STINAPA a hasi riba Klein Bonaire tabata na 2010. Dos aña despues Beukenboom a traha tres aña riba Klein Bonaire planta i kuida e palunan ku ta planta. Hopi di nan a krese i ta kasi tres meter haltu awor. Nan ta dunando fruta kaba ku para ta kome i asina sai simia riba e isla pa mas palu nase.