Kralendijk – Awor ku ta konfirmá ku e tipo ingles di e vírùs di corona ta na Boneiru, e oumento di e kantidat di kasonan di infekshon di e siman akí tabata di spera. 

E hendenan ku a tèst awor a pega ku e vírùs promé  ku Boneiru a pasa pa nivel di riesgo 5.  Asina departamento di Salubridat Públiko a anunsiá.  

Fuente

For di investigashon a sali na kla ku e vírùs por a plama lihé pasobra un grupo di hende a pasa anochi bailando i kantando den un lugá di hóreka. Hopi kasi di infekshon aktual, i grupo di infekshon esta cluster, tin di aber ku e kantamentu i baliamentu akí. E hendenan ku a pega ku e vírùs a pasa esei despues pa e personanan ku nan ta biba kuné den kas i pa nan koleganan. Ta ferwagt ku den kareda di otro siman lo por mira efekto di e medidanan mas severo. Si tur hende kumpli ku e reglanan, Salubridat Públiko ta spera di mira un bahada.   

Pueblo ta preokupá ku e kantidat di kaso aktivo di COVID-19 na Boneiru. Algun hende ta mira un lockdown komo solushon pa e oumento den e kantidat di kaso di infekshon.

Nivel 5

Dòkter Marian Luinstra-Passchier di Salubridat Públiko ta splika ku kiko ta tene kuenta pa disidí ki ta e nivel di riesgo ku ta pas mihó. ,,Nos ta wak e kantidat di infekshon i ta chek tambe kon grandi  preshon riba kuido ta debí  na e kasonan. Nos ta wak tambe e kantidat di kaso ku un fuente deskonosí di infekshon, i e kantidat di cluster, esta gruponan di hende ku a pega ku e vírùs. Ora ku konsiderá tur e kosnan akí bon, por konsehá pa bai un nivel di riesgo  siguiente. E medidanan ku nos ta konsehá pa tuma, mester kuadra ku situashon di e momento ei,’asina dòkter Luinstra-Passchier a deklará. ,,Ta pa e motibu ei a konsehá siman pasá ora tabatin un oumento di  hende ku a pega ku e vírùs, pa bai di nivel di riesgo 3 pa nivel di riesgo 5. Nos ta spera di mira efekto di esei den kareda di otro siman.”

Gezaghèber

GezaghèberEdison Rijna a hasi un yamada na pueblo pa keda trankil i no bai tras di fake news. A hasi e yamada despues ku ayera tabatin un grabashon di audio ta sirkulá ku Boneiru lo a bai den lockdown. Esaki sigur no ta e kaso, asina Rijna a informá. ‘Ora di bèrdè tin notisia grandi, ami ta e di promé pa kompartí esei ku pueblo’, asina Rijna a bisa. Departamento di Komunikashon i Protokòl ta sòru pa kompartí informashon verídiko i komunikado tokante e medidanan ku pueblo i prensa.

 Kumplimentu ku regla

A base di kontròlnan a sali na kla ku no ta tur hende ta tene nan mes na e reglanan nobo. Hende tin mag di bai snèk i restorant solamente pa buska kuminda pa bai kuné. No ta permití pa en espera di e kuminda pa bai kuné, hende dal beter ku otro. Despues di praktiká deporte tur hende mester bai kas mesora. Ta solamente e asina yamá pakus i tienda esensial tin mag di ta habrí. No ta permití grupo grandi di hende na laman. ,,Si hende hende tin keho di salú, nan mester keda kas i mèldu nan mes pa tèst di corona. I si tur hende biba komo si fuera nan a pega ku e vírùs i evitá di tin kontakto ku otro hende, huntu nos ta logra dominá e vírus,”asina Luinstra-Passchier a bisa.   

Yama 0800 0800 pa traha un sita pa test di corona. Pa e preguntanan mas hasí tokante e vírùs di corona: www.bonairecrisis.com

---

• 
  Pronto mester aktualisá bo Pagabon
• 
  Siman di Buki pa Mucha 2024: ‘Est’un Dushi Kabesura’ 
• 
  Boneiru su kamber di parto skondí: Miembronan di ekspedishon Blue Defenders ta deskubrí migrashon di mamíferonan di laman
• 
  Asesino di studianto médiko Saba trasladá pa Boneiru pa sinta ku kastigu
• 
  Fundashon Ambulans Deseo a tene su promé reunion pa boluntario