KRALENDIJK- Djárason atardi 13 di aprel, SKAL a organisá un aktividat spesial dediká na grupo Nos Kosecha. E grupo ta selebrá 45 aña di eksistensia i den kuadro  di nan aniversario, SKAL a traha un dokumental di e grupo. E grupo menshoná, prinsipalmente nan ta biba ku nos folklor i mantené nos kultura pa e no bai pèrdí. 

Nan ta kanta, balia, presentá skèch i mas. Nan a presentá na diferente okashon na Aruba i Kòrsou. Nan deseo ta pa kontinuashon di e grupo i tin deseo pa hóbennan kuminsá forma parti di e grupo. Aktualmente nan ta 9 miembro aktivo i diferente ya a fayesé. “Nos Kultura i kustumbernan mester keda.”   

Dokumental

Durante e aktividat e anochi ku a tuma lugá na Mangasina di rei, a presentá e dokumental. Raynel Cecilia a  papia, kende ta e persona ku a traha e dokumental. El a papia toka te e trabou i e kontenido i a menshoná ku ainda  falta mas hende pa tende nan eksperensia di e grupo.
Despues na nòmber di SKAL i gobièrnu, a hasi entrega di regalo pa tur miembro di e grupo menshoná. Ruddy Domacasse ta padrino di e grupo Nos Kosecha. A entrega tur hende 1 pa 1 nan regalo komo muestra di apresio. 

Diferente persona di agrupashon musikal, a hasi entrega di regalo na e hendenan.
Tambe a entrega e padrino un regalo. Na final, e grupo a kanta nan himno i un otro kantika. Nani tin 95 aña i ta e miembro di mas edat di e grupo. “No laga nos kosecha kai,” tabata nan mensahe final.