Kralendijk – Ta hopi importante pa habitante ku a pasa e promé angua kontra corona kaba, pasa e di dos angua tambe. Prinsipalmente awor akí ku e variante dèlta  ku ta hopi mas kontagioso i ta hasi hende hopi mas malu, ta avansando rápidamente den mundu.

Esaki departamento di Salubridat Públiko ta duna di konosé. “Boneiru mester ta bon prepará. Un persona ku ta kompletamente bakuná a pasa e promé i e di dos angua kontra corona. E persona akí por pega ku e vírùs ainda, pero e ta hopi mas mihó protehá kontra malesa grave i hospitalisashon ku un persona ku a pasa solamente  1 angua”.

Na Boneiru 80% di e grupo di enfoke di hende di 18 aña bai ariba a pasa e promé angua kontra corona, i 64,8% di e grupo akí a pasa dos angua. Di e hóbennan entre 12 i 18 aña, 20% a pasa e promé angua. Mas òf ménos 15% di e adultonan no a pasa e di dos angua ainda. Pa e motibu akí departamento di Salubridat Públiko ta hasi un yamada riba e abitantenan ku a pasa angua 1 biaha kaba, pa bai pasa e di dos angua tambe.

Bentaha

Un persona ku ta kompletamente bakuná i ku dos siman despues di e di dos angua tabatin kontakto estrecho ku un persona infektá, no tin mester di bai den karentena mas. Abitantenan ku ta kompletamente bakuná no tin mester di hasi tèst ora nan ta biaha di Boneiru pa Aruba òf Kòrsou.

Tur abitante ku ainda no a pasa e di dos angua kontra corona i no tin un sita pa hasi esei, por yama 0800 0900 grátis pa un sita. Riba djasabra nan por bin Kompleho Deportivo Jorge Nicolaas sin sita tambe pa pasa e angua. Nan tin ku bin ku nan karchi di bakunashon, e ora ei por nota e di dos angua riba e karchi.