KRALENDIJK – E Triangulo di Hustisia na Bonaire, ku ta konsistí di gezaghòber, e fiskal i hefe di Kuerpo di Polis di Hulanda Karibense (KPCN), ta hasi un apelashon riba shofùrnan pa kore di un manera seif i responsabel durante e siman di Regatta, ku konosé hopi aktividat.

“Reglanan di tráfiko mester wòrdu siguí na tur momentu pa garantisá seguridat riba kaminda,  inkluyendo evitá di manehá bou di influensia di alkohol, uso di faha di seguridat i keda sin usa telefon tras di stür”, asina bosero di KPCN ta bisa. 

Kontrolnan strikto

E portavoz di KPCN ta enfatisá ku lo tin kontrolnan di tráfiko mas estrikto durante e siman di fiesta, kaminda nan lo uza tèst di supla pa kontrolá riba uso di alkohol. Tambe e bosero ta advertí ku lo imponé sankshonan fuerte pa violashon di regla di tráfiko.