Unkobon relashoná ku kaya na Boneiru: Inakseptabel!

E seguridat den tráfiko aki na Boneiru, pa motibu di e kayanan ku ta peorando dia pa dia, a baha yega na un nivel inaksèptabel. Ta mas kla ku di dia ku Boneiru su so no por logra renobá sufisiente kaya den un término kòrtiku. Komo tal Unkobon ta boga pa un kambio struktural, den kual e instansha prinsipal pa ehekutá renobashon di e kayanan riba un término kortiku, ta den man di Hulanda.

Kayanan di Boneiru lo por mehorá un dia den futuru?

Resientemente progreso di e “Bestuursakkoord”, ku ta andando ya pa dos aña kaba, a keda husgá. Sekretario di estado, señor Knops y tambe Gezaghebber Rijna a duna di konosé na e okashon ei ku hopi kos a wòrdu hasí tras di kòrtina (analysis y vishon) Esaki ta e deklarashon pakiko e habitantenan di Boneiru apenas por a nota e mehorashonnan primintí ku mester a bin ku e “Bestuursakkoord” sostené pa Hulanda.

E sekretario di estado a mira algun lus den horizonte.  Segun señor Knops si tuma por ehempel  e kayanan bo ta mira un adelanto real.

Pero habitantenan di Boneiru ta opiná kompletamente otro. No tin adelanto. Kontrari. E kayanan ta mas malu ku nunka. Tráfiko ta oumentando kada dia mas i mas, truknan pisá yená ku greis ku ta kore bai bin pa e hopi konstrukshonnan ku ta tumando lugá i e awaseru di e ultimo dianan aki, a buta ku e kayanan a bira peligrosisimo.

Kayanan ta yená ku schur y buraku, kloakanan kibrá y kabelnan di telefon y koriente ku ta sali bin ariba den kayanan di tera pa motibu ku awa a koba saka nan. E poblashon y tambe e turistanan ta kore peliger inaksèptabel partisipando den tráfiko. Reparashonnan di urgensha ta wòrdu hasí demasiado lat. De bes en kuando ta asfaltá un kaya pero esaki ta sosedé demasiado poko poko (mira por ehempel Kaya Carlos A. Nicolaas) òf e ta sosodé robes (retonde Kaya Amsterdam, ku te ainda no ta kla). Asfaltamentu di algun shen meter ta nada kompará ku e kantidat di kayanan ku dia pa dia ta bira pió pa motibu di mas i mas buraku.

Situashon di e kayanan aki na Boneiru fasilmente por wòrdu kompará ku kayanan den paisnan di terser mundu. Pero Boneiru no ta forma parti di e terser mundu. Boneiru ta un munisipio di Hulanda, un di e paisnan mas próspero i riku di mundu. Boneiru ta un munisipio den Caribe i no den e parti Oropeo, por ta esei ta e diferensha? Na Hulanda hasta kamindanan den mondi ta muchu mas mihó ku e kareteranan prinsipal den Hulanda Caribense.

Ya pa basta tempu Unkobon ta den diálogo ku e diputado responsabel pa kayanan aki na Boneiru, señor James Kroon. Segun señor Kroon a deklará na Unkobon ku e tambe ta hopi disgustá i malkontentu ku renobashon y drechamentu di e kayanan, no tin e progreso ku e ta deseá. E problema ta ku Boneiru no tin e finansas nesesario i e ekspertisio pa drecha i renobá e kayanan den un término deseabel.

Un investigashon a indiká ku un renobashon sólido di tur e kayanan aki na Boneiru lo kosta mas o menos 250 miyon dollar. Esaki lo bira un proyekto grandi ku lo tin hopi reto i  logistiko i ku lo bai tuma mas o menos 10 aña pa kaba. Esaki Boneiru komo munisipio chikí nunka lo por produsí i ehekutá su so. Pa esaki nos no mester tin berguensa. E munisipionan chikí na Hulanda tampoko lo ta por hasi esaki.

Tin e speranza ku un dia nos por goza di kayanan den bon kondishon aki na Boneiru?

Unkobon ta di opinion ku esaki solamente ta posibel si Gobiernu di Hulanda duna mas y tambe ofresé mas yudansa. Aktualmente Hulanda anualmente ta dunando en berdat ekstra plaka pa mehorashon di kayanan aki na Boneiru. Pero no ta sufisiente. Resultado di esaki ta loke ta sosediendo aktualmente. Kada aña un pida di algun shen meter asfalt  mientras sobrá di e kaya ta den dekandensia.

Lo tabata muchu mas mihó si gobiernu hulandes para garantia pa e montante nesesario ku ta ser kalkulá na 250 miyon dollar**. Esaki lo atraé kontratistanan di rònt mundu pa ehekutá e proyekto magno aki. Despues di a sigui koutelosamente e prosedura pa selekshon di un kontratista  lo negoshá ku e kompanianan grandi aki ku tin hopi ekspertisio y eksperensia ku e trabounan kompleho aki. Nan lo por risibí un kontrakto di mas aña òf wòrdu retirá den kaso di mal prestashon. Tambe lo por obligá e kompanianan aki pa traha huntu ku e kompanianan lokal di moda ku lo bin sufisiente trabou pa e trahadónan lokal.

Gobiernu hulandes mes lo mester ehekutá e prosedura di selekshon y e direktorado òf buta e enkargo aki serka Rijkswaterstaat unda tin e ekspertisio nesesario. Hasiendo esaki Hulanda no mester tin miedu ku e plaka destiná pa drechamentu y renobashon di kayanan aki na Boneiru, no wòrdu utilisá korektamente. Boneiru na su turno no mester preokupá su mes mas ku desaroyo di e kayanan nobo. Boneiru lo mester buta solamente atenshon riba mantenshon di e kayanan. Esaki mes lo ta un trabou enorme. Un bonita repartishon di trabao: Hulanda ta tuma e mehorashon y renobashon di e kayanan na su enkargo y Boneiru ta tuma e matenshon na su enkargo.

Pa Unkobon e akshon ariba menshoná ta e uniko manera pa yega na mehorashon di e kareteranan peligroso aki na Boneiru den un término kortiku. Boneiru su so no por, esei a keda demostrá kaba. Hulanda mester kai aden.

**

250 miyon dollar ta di mas pidí? No. Gobiernu Hulandes ta presupuestá anualmente 2.5 pa 3 milyard euro pa drechamentu y mehorashon di su kareteranan (website Rijksoverheid.nl aanlegprogramma voor wegen) E 25 miyon dollar ku mester anualmente durante un periodo di 10 aña pa Boneiru no ta ni 1% di e presupuesto anual pa kayanan na Hulanda.

PS

Mientras tantu Hulanda a nombra un Programmamanager Wegen pa Boneiru. Esaki lo mester bai traha plannan nobo pa mehorashon y renovashon di e kayanan aki na Boneiru. Unkobon ta spera sinseramente ku e meneer aki kompartí e idea di Unkobon p’asina konvensé Hulanda pa riba un término kortiku, ehekutá e problema di kaya aki na un otro manera.

---

• 
  Kiwanis Club of Kralendijk Bonaire tin un direktiva nobo i ta selebra di 5 aniversario 
• 
  Bonaire Tourism Summit 2023 a start na Courtyard Hotel
• 
  Paga tinu riba uso di awa | Aviso
• 
  JetAir Caribbean Ta Cuminsá Buelanan pa Boneiru dia 1 di November
• 
  Servisionan di investigashon di krímen ta interseptá boto ku paranan eksótiko i arma