Wer instabil riba islanan ABC 

KRALENDIJK – Segun e último pronóstikonan di Caribbean Weather Center nos por spera e siman aki riba tur e islanan algu di awaseru i mal tempu.

Segun pronóstiko wer lo ta instabil pa motibu di un ola tropikal aktivo ku ta aserkando e área di Karibe. Áreanan di Guadeoupe te Trinidad mester prepará nan mes pa yobidanan i mal tempu fuerte, loke por kondusí na inundashonnan. Ounke e parti mas grandi di e aktividat lo trèk bai nort di e islanan lokal, ta eksistí ainda un chèns riba awaseru lokal riba e islanan ABC. E próksimo dianan lo ta nublá.

Pa djabièrnè e visibilidat di shelu lo ta nublá atrobe pa motibu di un kantidat di santu di Sahara ku ta alkansá nos region atrobe. Mester ta prepará tambe pa bientu ku ta keda kambia di direkshon i ku segun ta pronostiká lo por oumentá djarason anochi. E temperaturanan máksimo lo ta entre 32-33 grado Celsius, mientras e temperatura mínimo ta keda masoménos 27 grado Celsius.