Willemstad – Despues ku Kolegio di supervishon finansiero a risibí notifikashonnan anónimo, riba enkargo di presidente Raymond Gradus a entamá un investigashon independiente. A base di e investigashon aki a konkluí ku no tabatin violashon di integridat ni komportamentu eksesivo; sí a konstatá ku tabatin kaso di deskuido.

Ta nesesario pa introdusí mehorashon den e organisashon atministrativo i hasi e proseduranan interno mas skèrpí na sekretariado di Cft. E notifikashonnan anónimo, kual a keda entregá na komienso di aña, tabata kontené akusashon kontra e sekretariado di e tres Kolegionan. E agensia independiente EBBEN PARTNERS a ehekutá e investigashon di hecho.

Gradus: “Ounke e notifikashonnan a keda hasí anónimamente, mi a konsiderá komo mi responsabilidat pa tuma e alegashonnan ei na serio i laga un agensia independiente investigá nan mas pronto posibel. Miéntras tantu esei a tuma lugá i nos a risibí e relato di e investigashon.”

Gradus ta kontinuá: “Apesar ku a base di e investigashon no a konstatá violashon di integridat ni kondukta eksesivo, ta resultá ku tin nesesidat sí pa den sentido general introdusí mehorashon den e organisashon atministrativo i pa hasi e proseduranan interno mas skèrpí.”

Desishon

Gradus ta indiká ku komo resultado di e konklushonnan di e investigashon di hecho a tuma vários desishon. Por ehèmpel ta formulá e proseduranan relashoná ku dunamentu di trabou na personal riba un base temporal i esnan relashoná ku biahamentu pa eksterio den un forma mas skèrpi, i den futuro lo no duna gratifikashon den natura mas. Ademas, lo pone e maneho di gratifikashon riba papel, e presidente lo aprobá esaki i e sekretario lo aplik’é.

Riba un otro tereno tambe lo hasi un korekshon. Asina ta ku te desèmber 2019 tabata paga anualmente un gratifikashon di Pasku di ANG 1.000 neto na tur empleado di e sekretariado. Pa e personal lokal tabata konvertí e gratifikashon aki den un suma bruto. A keda sin hasi e prosesamentu atministrativo aki pa e personal ku ta bini di eksterior. Lo konsultá awor ku e Ministerio di Asuntunan Interno i Relashonnan den Reino kon ta konvertí e suma neto ainda den un suma bruto pa e empleadonan aki. A base di un ouditoria lo determiná mas despues si a kumpli korektamente ku e proseduranan di e atministrashon di salario.

Gradus: “Pa resumí: Cft tin un funshon ehemplar. Ta importante pa tur hende na Cft demonstrá un komportashon kompletamente íntegro. A inisiá un trayekto pa sigui hisa e nivel di konsientisashon riba tereno di integridat ku asistensia di un persona di konfiansa (vertrouwenspersoon).