KRALENDIJK –  8 di sèptèmber ta dia internashonal di Alfabetisashon. E dia akí t’ei pa kòrda tur hende kon importante ta pa alfabetisá. No solamente pa e persona mes, sino tambe pa e komunidat kompleto. Ku e lema ‘Kibra e barera di miedu! Ban dilanti, ban FORMA’, Fundashon FORMA ta pone atenshon na e importansia di alfabetisashon durante e dianan di 5 pa 9 di sèptèmber.

Pa mas ku 14 aña FORMA a bin ta traha duru na konsientisashon di komunidat i ta duna guia riba tereno di alfabetisashon. Un analfabeta funshonal ta un persona ku por lesa i skibi un tiki, pero no sufisiente pa atendé su asuntunan di tur dia. Ku e persona no por lesa ni skibi sufisiente tin un impakto grandi den su bida. Tambe ora di buska trabou òf mantené un trabou e persona analfabeta funshonal por enkontrá problema. 

Banda di siña lesa i skibi, alfabetisashon ta mehorá e adulto su abilidat komunikativo i amplia su balor propio. Den e lèsnan na FORMA kada persona ta traha riba su propio metanan. Na momentu ku e persona logra un meta e ta haña un sertifikado. Esaki ta un logro pa e persona i algu pa e ta orguyoso di dje, tambe esaki tin bentaha pa su doño di trabou. 

FORMA ta usa diferente método i manera di traha, asina e adulto ta praktiká entre otro ku lesa i skibi. Tambe ta trata temanan ku ta importante den bida diario, manera paga resibu. FORMA ta usa dos programa digital ku ta usa tema ku kua e adulto ta praktiká ku lesa i skibi: Alfabeter i Notinèt.

Den e siman aki di selebrashon, FORMA ta duna atenshon spesial na su partisipantenan i ta bishitá algun medio di komunikashon. Tambe riba medionan sosial lo tin atenshon pa e tema di alfabetisashon. Na fin di luna di sèptèmber lo bai tin un evento huntu ku su partnernan de fèlt riba e tema di alfabetisashon.

Pa medio di Alfabetisashon, FORMA ta traha huntu ku e adulto analfabeta funshonal na un mihó futuro pa su mes i e komunidat di Boneiru.