KRALENDIJK – Pa prevení froude di identidat (Froude ku ID) na Hulanda Karibense, Kuerpo Polisial Hulanda Karibense (KPCN) a start un kolaborashon ku Centraal Meldpunt Identiteitsfraude (CMI) di Rijksdienst voor Identiteitsgegevens (RvIG).

Huntu nan a traha un kampaña di informashon, den kua pa medio di diferente kanal ta duna mas splikashon tokante kiko ta Froude di identidat (ID), kon bo por prevení esei i kiko bo por hasi pa prevení e forma di delinkuensia (sibernétiko) akí. Awor ta asina leu, e kampaña di informashon a kuminsá e siman akí. 

Pa oumentá e impakto di e kampaña di informashon, KPCN tin planiá pa bai kolaborá ku bankonan i mkb. Nan tin nan propio kanalnan di komunikashon i ta duna hopi balor na prevenshon di froude ku ID. Komunikando tokante esaki di forma koordiná i simultáneo, habitantenan di Hulanda Karibense ta tende e mes  mensahe for di diferente ángulo.

For di aprel 2021 KPCN a forma un tim sibernétiko speshal ku e meta pa ofresé bon sosten den kaso di delinkuensia sibernétiko. E tim sibernétiko di Kuerpo Polisial Hulanda Karibense ta úniko den e parti karibense di  Reino i ta buska aktivamente kooperashon (internashonal) ku kuerpo- organisashon- i partnernan ku na nan turno ta sostené nos den esaki. E sekshon ta enfoká riba kontrarestá i kombatí delinkuensia sibernétiko i oumentá siguridat digital (cybersecurity). Delinkuensia sibernétiko i Froude ku ID hopi bia ta direktamente asosiá ku otro. 

Na Hulanda Karibense tin hopi servisio online ku ainda no ta dje desaroyá ei manera na Oropa. Pero desaroyonan na Hulanda Karibense ta kana rápido. P’esei ta nesesario pa for di awor aki kaba atvertí habitantenan di Boneiru, Sint Eustatius i Saba pa e peligernan di Froude ku ID. Asina aweró nan ta alertá, por ehèmpel ora di sera abononan online, i nos por prevení e forma akí di delinkuensia sibernétiko mas tantu posibel.

Meldpunt Identiteitsfraude (CMI) ta parti di Rijksdienst voor Identiteitsgegevens (RvIG). Siudadanonan por akudí na CMI pa:
– denunsiá froude ku identidat
– tepnan pa prevení froude ku identidat
– konseho i sosten ora un persona ta víktima di froude ku identidat

Ademas CMI ta kontribuí ku presentashon-, tayer- i otro aktividatnan di informashon na konsientisashon i  prevenshon di froude ku identidat. 

Pa mas informashon por bishita www.rvig.nl/centraal-meldpunt-identiteitsfraude òf tuma kontakto ku e departamentu di cybercrime via meil na [email protected]  òf yama 715 8000 i puntra pa e departamentu di krímen sibernétiko (cybercrime).