WILLEMSTAD – Ayera mainta Kòrsou a hañ’é konfrontá ku un tiroteo ku resultado fatal. Anochi esaki a ripití i atrobe a tira hende mata. No ta konosí ainda si e dos kasonan ta relashoná ku otro.

E tiroteo mainta tempran a tuma lugá nèt promé ku 6’or den kurá di un kas na Kaya Strena na Seru Fortuna. Polis a haña e hòmber den un plas di sanger, e tabatin diferente herida di bala den su barika.

Despues a identifiká e persona komo Sidney Marten Mercelina di 27 aña i nasé na Kòrsou

E di dos tiroteo ku resultado fatal a tuma lugá mèrdia den Pamponastraat na Marie Pampoen. Polis a haña e hòmber ku heridanan di bala. No ta konosí ainda loke a pasa presis einan.