Kralendijk/Miami- E pilotonan di EZ Air Timothy Vaseur i José Zambrano a bira e promé Captain i ‘First Officer’ riba e avionan Saab340 di e kompania EZ Air.

Despues di a sigui entrenamentu na ‘ground school’ e dosnan a bula bai Miami pa nan sigui kurso den Simulator. E siman aki tur dos a gradua i a risibi e asina yamá ‘Type Rating’ pa por bula e avion aki.

Despues ku Vaseur i Zambrano yega bèk Boneiru, lo tin otro ekiponan di EZ Air ku lo kuminsá ku e kurso pa por wòrdu sertifiká riba e avionan mas grandi ku ta karga 34 pasahero.

Intensivo

José Zambrano, den kombersashon ku AworBonaire a bisa ku e entrenamentu tabata basta intensivo pero tambe dushi pa hasi. “Hopi koi siña, pero e ta bai si”, asina Zambrano a bisa.

Ambos Vaseur i Zambrano tin basta aña ta bulando kaba pa EZ Air, respektivamente komo Capitan i First Officer. Zambrano sa bula tambe e avion Britten Norman Islander como ‘Pilot in Charge’ (PIC).