KRALENDIJK – Riba djabièrnè, 7 di òktober, Koninklijke Marechaussee (KMar) a detené un hende hòmber di 52 aña riba sospecho di labamentu di plaka. E hòmber tabatin e intenshon di biaha pa Repúblika Dominikana via Bonaire International Airport (BIA). Durante kòntròl di seguridat na aeropuerto a resultá ku e hòmber tabatin vários ènvelòp skondí na su kurpa, ku na total kasi 20.000 dòler Merikano na plaka kèsh.

E trahadó di seguridat di BIA ku a haña e plaka, a alertá Duana i KMar. Huntu nan a realisá un investigashon, kaminda despues trahadónan di KMar a detené e hòmber riba sospecho di labamentu di plaka. Reshèrshi di Koninklijke Marechaussee ta sigui ku e investigashon i a konfiská e plaka pa mas investigashon.

Personanan ta obligá di por demostrá orígen di plaka kèsh. Si un persona importá òf eksportá un montante di 10.000 dòler Merikano òf mas, mester indiká esaki serka Duana. Duana i Koninklijke Marechausse ta traha huntu riba kòntròl di bienes i persona na entrada i salida di Hulanda Karibense.