Oranjestad, St. Eustatius- E isla di St. Eustatius ta preparando pa poko poko habri su fronteranan bèk pa e públiko biahero.

Den un promé fase tur residente ku a wòrdu bakuná kaba por drenta bèk isla ora nan sali biaha pa otro isla. Ora di regresá nan no mester presentá ni prueba di PCR, ni no mester bai den karentena.

Den e di dos fase, ku ta kuminsá for di dia 9 di mei, biahero di e otro islananan Hulandes Karibense, tambe por drenta bou di e mesun kondishon, basta nan ta kompletamente bakuná kaba. Ta konsiderá hende kompletamente bakuná ora nan a pasa tur dos angua.

Den e kaso aki tampoko no ta rekerí ni prueba di PCR, ni no mester bai den karentena.

Fase 3 ku 4

Den fase 3 tur turista por bishitá St. Eustatius sin hasi tèst di PCR, kaminda no mester bai den karentena. Sinembargo, esaki lo ta posibel solamente ora e turista en kestion ta ya kompletamente bakuná, i alabes 50% di e poblashon di Statia mester ta bakuná kaba. Ta pesei, pa e fase aki no por pone fecha konkreto ainda.

De fase 4 tur hende por bishitá St. Eustatius ku òf sin ku nan ta bakuná. Sinembargo, den e kaso ei 80% di e poblashon lo mester ta bakuná pa no tin muchu peligar ku Corona lo por plama riba e isla.