DEN HAAG – A entregá un sospechoso di 30 aña, ku a detené luna pasá na Polen en konekshon ku asesinato riba Peter R. de Vries, na Hulandá.  Polis di Polen a detené e hòmber 26 di sèptèmber riba petishon di Hulanda. Ayera nochi el a yega Schiphol.

Ta sospechá e Polako di 30 aña ku el a yuda prepará e atentado. Ta kulp’é di komplisidat na asesinato ku intenshon terorista.

E sospechoso tabata biba e tempu ei na Rotterdam. Mañan ta present’é dilanti di wes komisario na Amsterdam. E sospechoso ta sintá den restrikshon,  esei ta nifiká ku e por tin kontakto solamente ku su abogado.

Seshon Pro forma 

Awe ta e promé huisio preparatorio den e investigashon di e promotor(nan)  i otro partisipantenan na e atentado riba De Vries. E hòmber ku nan a kaba di entregá no ta aparesé ainda na e huisio  aki.

Tres otro sospechoso si a yama pa presentá djaweps mèrdia na korte di hustisia na Amsterdam. Ta trata di un hòmber Polako di 27 aña ku probablemente lo a dirigí e tiradó i e shofùr durante di e atentado.

Na e seshon pro forma lo husga tambe dos sospechoso di 26 i 27 aña. Den verano último a detené nan na Spaña i Kòrsou pa motibu di komplisidat na e atentado. Ta sospechá nan entre otro di ta kómplise di asesinato ku intenshon terorísta.

Riba 6 di yüli 2021 a tira Peter R. de Vries na Amsterdam. Nuebe dia despues el a fayesé. Landelijke Recherche bou di guia di Landelijk Parket di Ministerio Públiko ta hasiendo e  investigashon di e promotor(nan) i  otronan partisipantenan ku ta embolbí den morto riba De Vries.

Ta husga e supuesto promotor(nan)  di e atentado, e tiradó i e shofùr,  den un huisio  separá.