KRALENDIJK- Hopi hende a reakshoná totalmente di shòk djasabra mainta ora nan a mira video di un pelea hopi mahos ku a tuma luga den Kaya Grandi.

Den e video por mira imagennan di un homber yòn ku ta wòrdu batí i asta ta risibí un skòp na su kabes pa algun otro hòmber yòn. Remarkabel ta ku por asta mira momentunan ku otronan ta tene e mucha hòmber en kestion, ku por mira sin kamisa, pa otronan por batièle mas duru. 

Realmente preokupante ta e manera ku, ora e mucha hòmber ku a keda batí ta risibí un skòp masha duru mes na su kabes, ora e ta drumí riba kaya kaba, manera di nòkout, sin por defendé su kurpa na e momentu ei. 

Manera por komprondé di informashon di KPCN, aktualmente tin dos hende arestá pa e violensia ku por mira riba e video. Lo trata di H.A.C. i J.D.E.R. No ta deskartá na e momentunan aki ku lo por tin mas detenshon. Na e momentu aki, ainda no tin masha informashon di e persona ku a risibí mas tantu sla i tambe e skòp den su kabes. Tin komentario sin embargo ku e persona aki tambe ta un hende problematiko ku mes lo a buska e problema ku e otronan. Esaki, lógikamente, no ta hasi e situashon menos severo i preokupante. 

Problema

No ta promé biaha ku un insidente ta mustra ku Boneiru tin un problema ku muchanan yòn ku ta riba kaya lat i sin supervishon i ku ta kada bes mas violento. Remarkabel tambe ta ku ta parse for di e imagennan ku niun hende a tuma e inisiativa di a yama polis pa por para e suseso.