Miembro di koneseho insular, Daisy Coffie, ta kondená totalmente e pelea ku a tuma lugá siman pasá den Kaya Grandi, kaminda al ménos un persona a keda malamente batí.

‘Komo miembro di Konseho Insular, komo mama, pero tambe komo siudadano di e isla aki, mi ta desaprobá enérgikamente e loke a tuma lugá siman pasá, kaminda den un forma inhumano un abuso físiko i di maltrato severo a tuma lugá den kayanan ­prinsipal di Boneiru. No ta importante kiko por a pasa ni ken tin falta, i tampoko ken a kuminsá, simplemente den un komunidat sivilisá algu asina ta intolerabel i inakseptabel’, asina Coffie a bisa.

Coffie a bisa tambe di ta spera ku e medidanan apropiá pa nos leinan lo keda apliká pa asina manda un señal kla i raspá ku nos no ta tolerá e tipo di violensianan aki den nos komunidat. ‘Nos komo hende no ta solushoná problema ku violensia i sigur nò ku violen­sia ku den nos Kódigo Penal ta kai bou di maltrato físiko severo i ku por tin hasta konsekuensianan fatal. Loke a pasa, a pasa kaba, pero e desaprobashon fuerte di henter nos komunidat kombiná ku aplikashon di nos leinan, mester prevení ku kualke ku ta pensa di resolvé un problema di e manera aki, lo pensa tres biaha promé ku aktua asina aki’.

Himno

Coffie ta mustra tambe ku den himno di Boneiru, ta menshoná ku nos ta un pueblo di un kondukta tur parti gabá. ‘E kondukta eksponé aki sigur no ta e kondukta menshoná  ku nos ta spera di kualké ku ta biba riba e Isla aki. Boneriano òf nò: esaki no por’, asina Coffie a klousurá.