SAINT GEORGE’S/WILLEMSTAD- Grenada Inland Revenue Department (IRD) ta e di 15 ofisina di impuesto ku lo bai hasi uzo di e software inovadó di BearingPoint Caribbean. Ku ekspanshon di su sírkulo di klientela mundial, e desaroyadó di software lokal ta demostrá ku tin un apresio enorme riba nivel internashonal pa teknologia desaroyá na Kòrsou.

Grenada lo hasi uzo di BearingPoint su sistema di Multi Tax Solution (MTS) pa mehorá kobramentu, rekoudashon, kòntròl di impuesto i brindamentu di servisio (online) na pagadónan di impuesto. Lo adaptá e sistema akí, ku ya kaba otro pais den region anglo-karibense ta uzando eksitosamente, na e legislashon fiskal lokal i na otro deseonan di Grenada. Grenada ta e di tres pais ku ta skohe pa implementá solushon MTS e aña akí.

Grenada, manera hopi otro Estado Insular Chikí den Desaroyo (Small Island Developing States – SIDS), ta hopi vulnerabel pa kambionan klimátiko, desasternan natural i dependensia ekonómiko riba turismo. Pa e motibu akí, den e era despues di COVID-19, gobièrnu di Grenada ke logra mas kapasidat di rekuperashon dor di mehorá su sostenibilidat fiskal. Den e kuadro akí, Ministerio di Finansa a inisiá ku un transformashon di e ofisina di impuesto, sostené pa implementashon di un sistema di outomatisashon ku a keda probá na otro pais.

A ehekutá e kontratashon públiko bou di supervishon di Banko Mundial. Despues di entregá ofertanan skibí, e suministradónan selektá mester a demostrá kalidat di nan software den un demostrashon ekstenso. A skohe BearingPoint komo e ganadó for di un grupo di suministradó for di entre otro Canada, New Zealand i Armenia.

Maneho

Banda di suministrá e software, BearingPoint lo ta responsabel tambe pa maneho di proyekto, maneho di kambio, migrashon di data, interakshon ku terser partidonan i kapasitashon di usuarionan final di IRD.

BearingPoint i su mas ku 115 empleadonan (di kua mayoria ta Yu di Kòrsou) ta hopi orguyoso ku ofisina di impuesto di Grenada tambe a skohe MTS i ku di e manera akí nan por duna un kontribushon na desaroyo di e isla.