KRALENDIJK- Kuerpo Polisial Hulanda Karibense, Ministerio Públiko i Entidat Públiko Boneiru den un komunikado de prens ta mustra nan preokupashon ku e pelea violotento ku tabata tin den sentro di suidat siman pasá. 

Triángulo a ekspresá di ta preokupá pa komportashon di sierto mirónes durante insidentenan violento. “En bes di intervení, ofresé ayudo na víktimanan òf yama polis, nan ta dediká nan tempu pa filma e violensia i publiká e videonan akí riba medionan sosial. E aktitut akí no ta solamente un falta total di rèspèt pa víktima- i otro personanan riba imágen, pero no ta kontribuí tampoko na un ambiente di bida nokturno agradabel i un Boneiru sigur”, asina a skibi. 

Triángulo ta hasi un yamada riba testigunan di tipo di insidente asina pa alertá polis mesora via di 911 i, si ta disponé di imágen, pa kompartí esaki solamente ku polis. Si un testigu ta deseá di keda anónimo, por informá polis via di e liña di tep 9310.

Di shòk

Gezaghebber interino Nolly Oleana a keda di shòk pa e insidente di siman pasá: “Tin hende na Boneiru ku kisas no tin e fásil. Kisas nan ta bebe muchu hopi òf ta usa droga. Tur esei no ta bon, pero NUNKA no por ta motibu òf argumento pa usa violensia. Maske ta respetá, òf tolerá otro. Si bo no gusta un persona òf si un persona bisa òf hasi algu robes? Bo  ta solushoná esei e ora ei ku palabra OF bo ta buska ayudo. Bringa no ta un opshon. Niun hende tin derechi pa tuma hustisia den propio man, sigur no ku violensia”.