KRALENDIJK – Boneiru por kuminsá ku e fase piloto kaminda Hustisia ta bai investigá kon e derecho penal por bira mas dirigí riba rekuperashon di e persona kulpabel riba e isla. E proyekto piloto ta kore te yüni otro aña i ta un inisiativa di Stichting Reclassering Caribisch Nederland, Fundashon Reclassering di Karibe Hulandes.

Korte Komun di Hustisia na Boneiru tin pa e proyekto piloto aki un grupo di ochi mediadó kualifiká na su disposishon i ku por intermediá den kasonan penal. Nan a finalisá na kumienso di e luna aki un kurso di spesialisashon.

Riba nan mes nan por laga sospechoso- i víktimanan drenta den kòmberashon ku otro riba e loke ku a sosodé i loke ku mester pa aklará òf drecha (parsialmente) e loke ku a sosodé.

Den un akuerdo final Ministerio Públiko i  huisio ta inkorporá e  resultado na momentu di arbitrá e kaso. Partisipashon ta semper boluntario, pues ta solamente si tantu e sospechoso komo e víktima ke.

Mediashon di rekuperashon

E mediadónan por guia un enkuentro tambe pafó di derecho penal. Esaki yama Mediashon di rekuperashon. Por usa esaki na momentu ku partidonan tin nesesidat, sea promé òf despues di un proseso penal, na un konfrontashon, pasobra e ta yuda nan rekuperá emoshonalmente.

Esaki por ta por ehèmpel e kaso ora Hustisia no ta trata un kaso òf ora ku a disidí pa no hasi denunsia.

Tambe por tin Mediashon di rekuperashon ora ku a kastigá un sospechoso. Mediashon di rekuperashon tambe semper ta tuma lugá riba un base boluntario. Un Mediashon di rekuperashon no tin influensia riba e proseso penal.