KRALENDIJK – Kuater kolaboradó di ‘meldkamer’ di Kuerpo Polisial Hulanda Karibense (KPCN) i dos empleado di Kuerpo di Bombero Hulanda Karibense (BKCN) resientemente a sigui un kurso intensivo.

E kurso tabatin komo meta pa sertifiká e koleganan nobo di e ‘meldkamer’ di e islanan di Hulanda Karibense komo sentralista. Durante un siman nan a siña, entre otro, ki tipo di pregunta mester hasi pa risibí e informashon korekto i konkreto tokante e situashon na momentu ku yamada di emergensia drenta i pa despues despachá e unidatnan di ayudo konserní pa duna asistensia. 

Pa promé biaha BKCN a partisipá na e kurso aki pa haña un impreshon di kiko ta e prosedura na momentu ku yamada di emergensia drenta na ‘meldkamer’. E ‘meldkamer’ ta funshoná pa tantu polis, brantwer i e servisio di ambulans di Hulanda Karibense. E partisipashon di BKCN den e kurso ta algu úniko ku ta kontribuí na mehorashon di e kolaborashon entre e partnernan.

E sentralistanan aktual tambe a sigui e kurso pa por ta na altura di e último desaroyo pa ku funshonamentu di e ‘meldkamer’ ku awor ta konta ku aparatonan moderno i stándarnan di ‘meldkamer’ general na Hulanda