ORANJESTAD – Ta spera ku lo finalisá e fase di ekspanshon di e aeropuerto di Aruba den e di tres kuartal di otro aña. Esei Aruba Airport Authority ta informá. E proyekto yama proyekto Gateway 2030. 

E ta enserá entre otro diferente fase, entre kua e desaroyo di un espasio di check in mas grandi na e parti Merikano di e aeropuerto, desaroyo di espasionan pa despacho di ekipahe i almasenamentu, porta di salida èkstra i espasio pa warda pa avionnan.

Mas okupá

Aruba Airport ta un di e aeropuertonan mas okupá den e region di Karibe i ta risibí mas ku 2,5 mion pasahero di 22 diferente kompania di aviashon anualmente. Aktualmente e aeropuerto tin 34 destinashon rònt mundu.

E aeropuerto ke bira un aeropuerto duradero, sigur i resistente pa futuro ku ta ofresé servisio ekselente na kliente i ta reflehá e hospitalidat di Aruba.