KRALENDIJK-  Riba djamars, alrededor di 12 or di mèrdia, ‘meldkamer’ sentral di Korps Politie Caribisch Nederland (KPCN) a risibí notifikashon tokante ladronisia for di den un negoshi situá na Kaya Grandi. 

Un trahadó di e negoshi a tuma kontakto ku polis despues ku e tabata sospechá ku un grupo di turista a hòrta un tas di kueru kostoso. Mesora a dirigí un patruya pa tuma deklarashon serka e persona ku a mèldu. 

Agentenan di Kuido Básiko di Polis a kuminsá mesora ku un investigashon i ku yudansa di un testigu, nan a logra lokalisá e sospechosonan den sentro di siudat. Pa nan prueba nan inosensia, e sospechosonan a invitá polis pa bai den nan kamber di hotèl, pa demostrá ku nan no a hòrta nada. 

Unabes den e kamber di hotèl, durante e investigashon e agentenan a bin haña e tas hòrtá. A detené un hòmber di inisial A.Z.J. di 20 aña di edat en konekshon ku ladronisia. E tas entretantu a keda entregá bèk na e negoshi.