Pòtret: BKCN

KRALENDIJK- Djaweps 4 di mei, banda di dia di Konmemorashon di Defuntu, ta tambe e dia Internashonal di Bombero (International Firefighters Day). 

Riba e dia aki mundialmente kuerponan di bombero ta para ketu na e tareanan ku bomberonan ta ehersé diariamente i e riesgo ku nan ta tuma pa asina kontribuí na seguridat general.

Na honor di e dia aki, algun vehíkulo di bombero lo kore den e kayanan di Boneiru, Sint Eustatius i Saba, riba djaweps 4 di mei, entre 11 or di mainta i 12 or di mèrdia. Lo tene kuenta ku e aktividatnan di Konmemorashon di Defuntu durante ku ta hasi esaki.

“E tarea di bombero no ta fásil. Den kaso di insidente òf peliger kaminda un persona sivil lo kore p’é, e bombero kontrali di esei lo kore bai serka dje. Ku esaki BKCN ke gradisí e bomberonan pa sirbi i protehá komunidat 24/7. Si bo mira nos héroenan, tuma un momento pa huntu ku nan selebrá e Dia di Bombero i agradesí nan pa e trabou ku nan ta hasi”, asina BKCN a bisa den un komunikado pa prensa.