ORANJESTAD – Aruba ta tene di 10 te ku 12 di mei e promé Caribbean Climate & Energy Conference, den koperashon ku Hulanda. Pa motibu ku e islanan chikitu ta asina vulnerabel pa kambio di klima i e konsekuensianan negativo ku nan ta eksperensiá kaba, Aruba i Hulanda a sinti e nesesidat pa promové mundialmente koperashon pa loke ta trata e manera di atendé ku un akshon pa klima bou di e islanan chikitu.

E vishon di gobièrnu di Aruba ta dirigí riba un transishon pa energia ku por renobá. Aktualmente e pais ta saka djesshete porshento di su energia for di fuentenan ku por renobá i e meta ta pa alkansá otro aña 35 porshento i na 2030 sinkuenta porshento. Esaki ta kontribuí na redusí e kalentamentu mundial te 1.5 grado Celsius.

Riba invitashon di promé minister Evelyn Wever-Croes di Aruba i minister di Klima i Energia di Hulanda, Rob Jetten, representantenan di diferente pais i organisashon ta bini huntu durante e konferensia. Entre otro representantenan di islanan den área di Karibe, Oséano Pasífiko i stakeholders. Tambe organisashonnan di Nashonnan Uní, insitushonnan edukativo i finansiero lo ta presente.

Reino Hulandes

Riba e promé dia ta papia riba e traspaso pa klima i energia den Reino Hulandes, inkluso e koperashon nesesario pa alkansá e metanan di klima di Paris 2030. Aruba, Kòrsou, Boneiru, Saba, Sint Maarten, Sint Eustatius i Hulanda lo  ta presente akinan.

Riba e dia aki Aruba i Hulanda ta firma un akuerdo di koperashon, kaminda Hulanda ta yuda Aruba pa haña finansiamentu pa e traspaso di energia fósil pa energia ku por renobá.

Internashonal

E di dos dia tin un orientashon internashonal. Despues un panel ámplio di diferente pais i organisashon ta diskutí e akshonnan di klima nesesario ku mester pa tur isla na mundu.

Paisnan ku a konfirmá nan partisipashon kaba ta entre otro España, Mexico, Islanan Marshall, Grenada, Sürnam, Panamá, Belize, Sint Maarten, Sint Eustatius, Saba, Kòrsou i Boneiru.

Aruba

Riba e último dia e enfoke ta riba e desaroyo i esfuersonan di Aruba pa loke ta trata e transishon di klima i energia. Tin diferente presentashon di proyektonan andando i tin posibilidat pa diskutí unda Aruba ta awor i na unda e ta bai den futuro riba tereno di transishon di klima i energia.

Aruba ta presentá proyektonan manera Eagle LNG, Parke di bientu i HydrogenValley. Durante e dianan aki e partisipantenan ta bishitá diferente proyekto di klima i energia na Aruba.