Willemstad – Na Kòrsou gerensia di PSB Bank ta konfirmá ku resientemente a deskubrí sierto iregularidat ku e sistema di Pagafasil. Esaki a kondusí na un investigashon i pa por kontinuá ku esaki, a suspendé algun empleado.

Gerensia di e banko ta enfatisá ku e investigashon no tin ningun influensia riba stabilidat di e banko. “Ounke ku e sistema di Pagafasil semper tabata i lo sigui ta seif pa hasi uzo di dje, ta hasiendo e ahustenan nesesario pa den futuro garantisá un nivel mas haltu di kòntròl interno. Miéntras tantu, por sigui hasi uzo di Pagafasil”, asina gerensia di PSB ta skibi den un relato pa prensa.

E iregularidat deskubrí ta enserá un montante di alrededor di nuebeshen mil florin (ANG 900.000). Ounke ta trata di un montante konsiderabel, di ningun manera e iregularidat aki ta afektá solides di e banko. PSB Bank, promé ku a identifiká e iregularidat aki, ya kaba tabata tumando e pasonan nesesario pa “upgrade” e sistema riba kua Pagafasil ta funshoná. Esaki ku e meta pa duna mihó servisio i pa garantisá mihó kòntròl interno di e prosesonan mará na uzo di Pagafasil.

Investigashon

Motibu di e suspenshonnan ta pa duna espasio pa terminá e investigashon. Tambe ta importante pa klarifiká ku no ta sospechá tur e empleadonan suspendé di enbolbimentu direkto den e iregularidat. Pa no influensiá e investigashon ni tacha privasidat di e empleadonan enbolbí, gerensia di PSB Bank lo no duna mas informashon den e fase aki.

---

Lesa tambe:

• 
  Thuersten Winklaar ta bringa pa e título di Kampion Hulandes na Den Haag
• 
  Prevení Zika, Dengue i Chikungunya
• 
  Zulay Nahr ta kompartí alegria di Pasku ku famianan den nesesidat na Boneiru 
• 
  Winair i KLM reintrodusí akuerdo di kódigo kompartí
• 
  Komishon Herensia Kultural ke protekshon pa identidat di Dia di Rincon