PHILIPSBURG- E aerolínea di Sint Maarten, WINAIR, ta sperando yegada di su prome avion ‘grandi’, un ATR-42 na e isla.

E prome di dos avionnan di e tipo, ku ya a pasa un proseso di mantenshon rigoroso, ta pintá kaba den e kolornan di WINAIR i awor ta serka di kla pa wòrdu transportá pa Sint Maarten.

Direktor Michael Cleaver di WINAI, ta bisa cu e avion lo wòrdu usá prinsipalmente pa buelonan pa e islanan ABC i Haiti, asina ku nan ta kla ku e proseso di sertifikashon. A pesar di di vários reto i retraso komo efecto di e pandemia di COVID-19 – entre otro entrega lat di sierto pieza- Cleaver ta mustra su mes optimista.

“Mi ta spera ku WINAIR lo por kuminsá ku buelonan ku ta generá entrada na komienso di juli 2023,” segun e hombre di aviashon. Komo preparashon pa e avion nobo na e flota, personal di WINAIR ta siguiendo kurso na e momentu aki.

Programa di lealtat

E yegada di e avionnan nobo no ta e úniko notisia na e aerolínea Banda di e ekspanshon di flota, e aerolínea di Islariba resientemente a bira sosio di e programa di Flying Blue di AirFrance/KLM.

Dor di e konbenio aki, pasaheronan riba buelonan di WINAIR den futuro serkano lo por gana y troka puntonan di Flying Blue.