BADHOEVEDORP – A plania e promé buelonan di Corendon pa Kòrsou pa novèmber, sinembargo e operadó turístiko/kompania di aviashon ta wak mas leu dilanti kaba. Mirando ku na 2025 ora e wetlease kòntrakt pa e Airbus A350 di e kompania di aviashon Spañó World2Fly ta terminá, Corendon ta konsiderá e posibilidat pa buska un Boeing 787. Esaki e CEO di Corendon, Steven van der Heijden, a revelá den un kòmbersashon resien ku Luchtvaartnieuws.nl.

Aktualmente, via di un akuerdo di dos aña ku World2Fly, Corendon ta hasi uzo di e Airbus, kompleto ku pilot i un parti di tripulashon di buelo.

“E meta prinsipal ta keda naturalmente e lansamentu eksitoso di nos promé buelonan pa Kòrsou,” Van der Heijden ta aksentuá. “Pero manera ku e operashonnan aki kana sin problema kuminsando for di novèmber, nos ta bai pensa riba e rumbo den futuro.”

Si ta trata di operashonnan independiente Corendon ta preferá di skohe pa Boeing enbes di Airbus. “Si nos mes ta bai bula, lo ta mas lógiko pa bai e fábrika di Boeing, mirando e similaridat ku nos kabinanan,” Van der Heijden ta splika. Corendon ta bulando aktualmente ku Boeing 737.

Van der Heijden ta spekulá: “Lo ta mas lógiko pa buska un modèl di e seri 787, ku pa loke ta trata uzo di kombustibel i zonido ta komparabel ku e A350. Mi ta duda si nos lo skohe e ora ei pa e Airbus.”