KRALENDIJK – Alrededor di 7 or di anochi, riba djadumingu 28 di mei, a bin topa ku algun artíkulo personal di Arthur den besindario di Sabana Piedra Krus. Un tim di búskeda a akudí mesora na e sitio i a buska te ku mas o ménos 9 or di anochi, pero sin resultado. 

Ayera, 29 di mei, alrededor di 11 or di mainta Kuerpo Polisial Hulanda Karibense a reanudá e búskeda di Arthur Cecilia mihó konosí komo ‘Turbo’. A organisá e búskeda bou di guia di KPCN den kolaborashon ku Koninklijke Marechaussee i Wardakosta, ku tabata presente tantu riba tera komo ku helikòpter. Ademas nan a risibí yudansa di Koninklijke Landmacht en Curaçao Militie ku ta riba e isla en konekshon ku un treinen. Durante e búskeda nan a buska den besindario di Washington Park, Bolivia i Sabana Piedra Krus. A buska tantu den mondi komo na kosta. A konkluí e búskeda pa 4.30 or di atardi sin resultado. 

A mira Arthur pa último biaha riba djadumingu alrededor di 5 or di mainta den besindario di Nort Saliña/Nawati. E tabatin un shòrt kolo bèrdè bisti i tabata lomba sunú.

Si bo por a mira algu òf sa paradero di Arthur ‘Turbo’, tuma kontakto ku polis via 715 8000, 911 òf via e liña di tep anónimo 9310.