WILLEMSTAD – Jamel Lomp, e hòmber ku nan a detené despues di un kaso di hinkamentu fatal na un sukursal di Albert Hein na Den Haag djamars último, no por a kaba sinta un tratamentu síkiko na Kòrsou, pasobra Capriles Kliniek no kier a intern’é; e tabata muchu peligroso. No ta konosí dikon nan no a traslad’é pa un klínika-tbs ( ta un sentro sikiátriko kaminda e personanan konserní ta na disposishon i ta forsá pa haña kuido) na Hulanda despues di un petishon di Ministerio Públiko di Willemstad.

Tantu na Hulanda komo Gran Bretania a sentensiá Jamel na vários okashon pa insidentenan violento i menasanan na Kòrsou.

Insidente violento anterior 

Jamel a haña djes luna di prizòn despues di un insidente violento na Tera Pretu na Bandabou ku su bisiña i primu Oswin ku el a akusá ku el a hòrta algu for di su outo. El a bisa ku el a mira esei ‘via un satélite’.

Pasobra Jamel a bira asina agresivo, Oswin ta bai skonde ku su famia. Kos ta bai robes na momentu ku e ta bolbe pa kue algun paña. Jamel ta ataká su primu ku un machete. Oswin ta kue un pistol i ta tira Jamel dos biaha den pechu. Oswin mester bai prizòn un aña, Jamel djes luna kitando aresto preventivo.

I e mester risibí tratamentu den Klínika Capriles. Pero nan ta nenga di asept’é: nan ta haña Jamel muchu peligroso. Klínika Capriles ta un hòspital sikiátriko i no tin e siguridat manera un klínika-tbs i pa e motibu ei no por a garantisá siguridat di su personal.

Asina Jamel por a bai bèk su bario ku e tabata terorisá, pa desgrasia di su bisiñanan bieu, ku tur ta famia di otro.

‘Trastorno di realidat serio’

For di un sentensia di e wes di Kòrsou na 2018 ta sali na kla ku Jamel ta mentalmente inkompetente i hopi peligroso. E wes ei a husga ku tin un relashon bon kla entre su trastornonan i diferente delito ku el a kometé na 2016 i 2017.

Den e sentensia ei a inkorporá e evaluashon di e sikiátro ku a saminá Jamel. E sikiátro ei a yam’é  ‘un hòmber sikótiko króniko ku halusinashonnan paranoiko’ i ‘halusinashonnan di realidat serio’. 

‘Su halusinashonnan tin un grado di realidat apsoluto p’e i no por korigí esaki. Falta tur klase di noshon di malesa. Ta konsiderá e individuo sumamente peligroso. Mester tuma su menasanan sumamente na serio. Ta konsider’é kapas pa ehekutá esakinan na momentu ku for di su mundu di halusinashon e ta konsiderá esaki hustu. El a demostrá esaki den pasado’, tin pará den e desishon.

E sikiátro a husga ku e chèns pa Jamel kometé algu semehante atrobe ta grandi. No ta konosí pakiko no a manda e hòmber di Tera Pretu Hulanda. Den e parti Karibense di Reino no tin klínikanan-tbs. Na mes momentu no ta asina tampoko ku kada medida di tbs (na disposihon di) ku dikta riba e islanan mester bai sint’é na Hulanda.

Ta benefisiá Hulanda si si tin un klínika-tbs riba un di e islanan. Den Haag ta responsabel pa ehekushon di kastigunan na Boneiru, Saba i Sint Eustatius. E islanan aki ta kai direktamente bou di outoridat di Den Haag.

E diferente ministernan di Hustisia di e paisnan den reino ta deseá un klínika-tbs pa tur isla huntu, spesialmente pa motibu di e gastunan, pero no a logra esei ainda.