QUITO – Djadumingu atardi a evakuá i listra un avion di KLM, ku a sali Amsterdam, pa motibu di un aviso di bòm despues ku el a baha na Quito, e kapital di Ecuador. A evakuá e pasaheronan di KL755. Un akshon di búskeda riguroso no a duna niun resultado, no a haña niun eksplosivo.

Outoridatnan lokal a informá ku alrededor  di 1’or di mèrdia ora lokal nan a haña notifikashon di posibel eksplosivo na bordo di e avion. Despues ku e avion a baha a tuma akshon mésora. Fuera di evakuashon i búskeda den e avion, a someté e terminal tambe na aktividatnan polisial mas intenso. Alrededor di 5’or di atardi polis a konfirmá ku e avion ta seif i ku no a haña eksplosivo na bordo.

Un bosero di KLM a informá: “Den konsulta ku outoridatnan di Ecuador a disidí pa tene kontrolnan di seguridat preventivo èkstra riba pasaheronan i karga promé ku nos bula bèk pa Amsterdam, Hulanda, via Guayaquil.” E aerolínea no ta ámplia mas riba e asuntu di seguridat.

Segun e korant Diario Expreso di Ecuador 98 porshento di avisonan di bòm ku ta hasi na Quito ta falsu.