DEN HAAG – Sekretario di Estado Van Huffelen den su kontesta riba preguntanan di Kamer a bisa ku e gobièrnunan di Kòrsou i Aruba no tin plan pa hasi matrimonio entre parehanan di e mésun sekso posibel.

E diskushonnan riba matrimonio entre parehanan di e mésun sekso den e parti Karibense di Reino ta kompliká i ta sensitivo. Kada un di e kuater paisnan outónomo den Reino – Hulanda, Aruba, Kòrsou i Sint Maarten – tin e responsabilidat pa garantisá e derechonan humano fundamental i libertat di su siudadanonan.

Korte Europeo 

Korte Europeo pa Derechonan Humano a husga ku si paisnan no habri e posibilidat pa matrimonio pa parehanan di e mésun sekso, nan ta obligá pa ofresé un alternativa, manera por ehèmpel un union sivil registrá pa pareha ankrá den lei.

Aruba ta e promé ku a dal un stap den e direkshon aki, ounke e union sivil registrá pa pareha aktual no ta ofresé e mésun derecho- i protekshonnan hurídiko manera un matrimonio. Kòrsou i Sint Maarten no a tuma semehante pasonan ainda.

Prohibishon di deskriminashon 

Mientrastantu Korte Komun di Hustisia di Aruba, Kòrsou, Sint Maarten i Boneiru, Sint Eustatius i Saba a husga ku Aruba i Kòrsou a violá e prohibishon di deskriminashon ekskluyendo parehanan di e mésun sekso pa kasa. Aktualmente e sentensianan aki ta den kasashon serka Korte Supremo.

Ounke e kaminda pa igualdat ta kompliká i insigur ainda, ta opvio ku e kestion di matrimonio entre parehanan di e mésun sekso lo keda para sentral den diskushonnan riba derecho- i libertatnan dentro di Reino Hulandes. Lo sigui e sentensianan di Korte Supremo ku hopi atenshon, sekretario di estado Alexandra van Huffelen ta bisa.